અમેરિકા સામે અણુ હુમલાની મંજૂરી આપતું ઉત્તર કોરિયા

ઉત્તર કોરિયાનું કહેવું છે કે તેણે પોતાની સેનાને અમેરિકા સામે અણુ હુમલો કરવાની મંજૂરી આપી દીધી છે. ઉત્તર કોરિયાની સેના તરફથી કરવામાં આવેલા એક નિવેદનમાં કહેવામાં આવ્યું છે કે "અમેરિકાની આક્રમક નીતિ અને અણુ ખતરાનો આકરી રીતે જવાબ આપવામાં આવશે. આ માટે નિર્મમ અભિયાનને મંજૂરી આપી દેવામાં આવી છે." સેનાએ કરેલા સત્તાવાર નિવેદનમાં ત્યાં સુધી કહેવામાં આવ્યું છે કે કોરિયા ટાપુમાં આજ અથવા કાલમાં યુદ્ધ શરૂ થઇ શકે છે.

બીજી તરફ અમેરિકન રાષ્ટ્રપતિ કાર્યાલયની રાષ્ટ્રીય સુરક્ષા પરિષદની પ્રવક્તા કેટલિન હેડને જણાવ્યું છે કે ઉત્તર કોરિયાનું નિવેદન સ્થિતિમાં સુધારાના સંકેત આપતા નથી. તેમણે આ નિવેદનને ભડકાઉ ગણાવ્યું હતું.

આ મુદ્દે કેટલાક નિષ્ણાતો વિશ્વાસ વ્યક્ત કરે છે કે ઉત્તર કોરિયા પાસે એવા રોકેટ અથવા હથિયાર છે, જેનાથી તે અમેરિકાને નિશાન બનાવી શકે છે. ઉત્તર કોરિયાએ પોતાની મિસાઇલ પ્રણાલીને પણ યુદ્ધ માટે તૈયાર રહેવાનો આદેશ આપી દીધો છે.

પ્રશાંત મહાસાગર સ્થિત ગુઆમ ટાપુ પર અમેરિકા તરફથી અત્યાધુનિક મિસાઇલ રક્ષા પ્રણાલીને તૈનાત કરવાની જાહેરાત કરાયા બાદ ઉત્તર કોરિયાએ આ ધમકી આપી છે.

ઉલ્લેખનીય છે કે અમેરિકાના સંરક્ષણ મંત્રાલય પેન્ટાગોને કહ્યું હતું કે ઉત્તર કોરિયાને પાઠ શીખવાડવા માટે આવનારા સપ્તાહોમાં તે બેલેસ્ટિક ટર્મિનલ હાઇ અલ્ટીટ્યુડ એરિયા ડિફેન્સ સિસ્ટમ (થાડ)ને ગુઆમ પર સજ્જ કરશે. આ વર્ષે ફેબ્રુઆરીમાં ઉત્તર કોરિયાએ પોતાનું ત્રીજું પરમાણું પરિક્ષણ કર્યું હતું. આ કારણે સંયુક્ત રાષ્ટ્રે તેની સામે પ્રતિબંધ મૂક્યો હતો.

ત્યાર બાદ અમેરિકા અને દક્ષિણ કોરિયાના સંયુક્ત અભ્યાસે ઉત્તર કોરિયાની નારાજગી વધારી દીધી હતી. આ કારણે ઉત્તર કોરિયાએ દક્ષિણ કોરિયા અને અમેરિકા પર હુમલો કરવાની ધમકી આપી હતી.

અમેરિકાના રક્ષા મંત્રી ચક હેગલે બુધવારે આપેલા એક નિવેદનમાં જણાવ્યું હતું કે પાછલા કેટલાક સપ્તાહોમાં ઉત્તર કોરિયા તરફથી જે પગલાં ઉઠાવવામાં આવ્યા છે તે વાસ્તવિક અને સ્પષ્ટ ખતરાના સંકેત આપે છે. ઉત્તર કોરિયાને કારણે દક્ષિણ કોરિયા અને જાપાનના હિતો માટે પણ જોખમ ઉભું થયું છે.

English summary

North Korea give approval for Nuclear attack against America.