પ્રિન્સ વિલિયમના પત્ની કેટ મિડલટન ટૂંક સમયમાં રૉયલ બેબીને જન્મ આપશે

Updated: Monday, July 22, 2013, 16:56 [IST]

લંડન, 22 જુલાઇ : બ્રિટનના શાહી પરિવારમાં થોડા જ સમયમાં નાના મહેમાનની કિકિયારીઓ ગૂંજી ઉઠવાની છે. પ્રિન્સ વિલિયમ્સની સગર્ભા પત્ની ડચીસ ઓફ કેમ્બ્રિજ કેટ મિડલટનને પ્રસવ પીડા શરૂ થતાં જ બ્રિટનના સમય અનુસાર સવારે 6 વાગે હોસ્પિટલમાં દાખલ કરવામાં આવ્યા છે. કેટ મિડલટનનું બાળક બ્રિટનનો ભાવિ રાજા કે રાણી બનશે.

આ અંગે બ્રિટનના દૈનિક ડેઇલી મેઇલના જણાવ્યા અનુસાર પ્રિન્સ વિલિયમ્સ પોતાની પત્ની કેટ સાથે સેન્ટ મેરી હોસ્પિટલમાં છે. આ જ હોસ્પિટલમાં વર્ષ 1982માં પ્રિન્સ વિલિયમ્સનો જન્મ પણ થયો હતો. બંકિમહામ પેલેસના અધિકારીઓએ જણાવ્યું છે કે કેટને પ્રસવ પીડા શરૂ થઇ છે.

આ અંગે શાહી પ્રવક્તાએ જણાવ્યું કે "કેટ મિડલટનને પ્રસવ પીડા ઉપડતાં જ કારમાં બેસાડીને હોસ્પિટલ લાવવામાં આવ્યા છે. આ દરમિયાન પ્રિન્સ વિલિયમ્સ તેમની સાથે જ રહ્યા છે. કેટને ઓવરડ્યુ થઇ ગયું હોવાથી લોકોમાં ચિંતા વધી છે."

કેટને હોસ્પિટલમાં દાખલ કર્યા બાદ આસ પાસની સુરક્ષા વ્યવસ્થા વધારી દેવામાં આવી છે. વર્તમાનમાં દુનિયાભરનું મીડિયા સેન્ટ્રલ લંડનમાં આવેલી સેન્ટ મેરી હોસ્પિટલની સામે ડેરો નાખીને ગુડ ન્યુઝની રાહ જોઇ રહ્યું છે. આ ઉપરાંત રાજ પરિવારના હિતેચ્છુઓ અને ચાહકોએ પણ હોસ્પિટલની આસપાસ ડેરો જમાવ્યો છે.

ઉલ્લેખનીય છે કે પ્રિન્સ વિલિયમ અને કેટનું આ સંતાન શાહી ગાદીનું ત્રીજું ઉત્તરાધિકારી બનશે. તાજેતરમાં કાયદામાં કરવામાં આવેલા ફેરફાર અનુસાર બાળકને હિઝ કે હર રૉયલ હાઇનેસ કહીને સંબોધિત કરવામાં આવશે. બાળકને પ્રિન્સ અથવા પ્રિન્સેસ ઓફ કેમ્બ્રિજ તરીકે બોલાવવામાં આવશે. જો સંતાન પુત્ર હશે તો એક દિવસ તે રાજા અને જો પુત્રી હશે તો રાણી બનશે.