માદુરોની ધરપકડથી અમેરિકામાં હોબાળો મચી ગયો, ટ્રમ્પના નિર્ણય સામે ન્યૂયોર્કથી લોસ એન્જલસ સુધી વિરોધ પ્રદર્શન
Venezuela Crisis: વેનેઝુએલાના રાષ્ટ્રપતિ નિકોલસ માદુરોની ધરપકડ કરવાના ડોનાલ્ડ ટ્રમ્પના સાહસિક ગણાતા નિર્ણયે હવે ખુદ અમેરિકામાં જ મોટું રાજકીય યુદ્ધ છેડી દીધું છે. ટ્રમ્પ આ ઓપરેશનને પોતાની મોટી જીત ગણાવી રહ્યા છે, પરંતુ વિપક્ષ અને અનેક મોટા નેતાઓએ તેને આંતરરાષ્ટ્રીય કાયદાઓનું ઉલ્લંઘન ગણાવી વિરોધ શરૂ કર્યો છે.
(AI Image)
ન્યૂયોર્ક મેયરની ટ્રમ્પને ચેતવણી: 'આ યુદ્ધ જેવું કૃત્ય છે'
ન્યૂયોર્કના નવનિયુક્ત મેયર જોહરાન મમદાનીએ કાર્યભાર સંભાળ્યાના બીજા જ દિવસે રાષ્ટ્રપતિ ટ્રમ્પને ફોન કરીને આકરો વિરોધ નોંધાવ્યો હતો. મમદાનીએ જણાવ્યું હતું કે, કોઈ સાર્વભૌમ દેશના વડા પર આ પ્રકારે હુમલો કરવો એ આંતરરાષ્ટ્રીય નિયમોની વિરુદ્ધ છે. તેમણે ચેતવણી આપી હતી કે જો માદુરોને ન્યૂયોર્કની જેલમાં રાખવામાં આવશે, તો શહેરની સુરક્ષા અને શાંતિ જોખમાઈ શકે છે.
કમલા હેરિસના પ્રહાર: 'તેલ માટે યુદ્ધ અને અરાજકતા'
પૂર્વ ઉપરાષ્ટ્રપતિ કમલા હેરિસે પણ ટ્રમ્પ સરકારના આ ઓપરેશનને "ગેરકાયદેસર અને જોખમી" ગણાવ્યું છે. તેમણે આક્ષેપ કર્યો હતો કે, માત્ર વેનેઝુએલાના તેલ ભંડાર પર કબજો કરવાના લાલચમાં અમેરિકાને યુદ્ધમાં ધકેલવામાં આવી રહ્યું છે. હેરિસના મતે, આ સૈન્ય કાર્યવાહી બાદ ટ્રમ્પ પાસે કોઈ 'એક્ઝિટ પ્લાન' નથી, જેના કારણે અમેરિકા વધુ અસુરક્ષિત બની શકે છે.
બંધારણીય સંકટ: સંસદની મંજૂરી વગર કાર્યવાહી?
અમેરિકી સંસદમાં પણ આ મામલે સવાલો ઉઠી રહ્યા છે. હાઉસ ઇન્ટેલિજન્સ કમિટીના સભ્ય રાજા કૃષ્ણમૂર્તિ સહિતના સાંસદોનું કહેવું છે કે, રાષ્ટ્રપતિ પાસે કોંગ્રેસની મંજૂરી વગર કોઈ બીજા દેશમાં સેના મોકલવાનો બંધારણીય અધિકાર નથી. આ પગલું ભવિષ્યમાં ખતરનાક ઉદાહરણ પૂરું પાડી શકે છે.
શેરીઓમાં વિરોધ: "તેલ માટે હવે કોઈ યુદ્ધ નહીં"
અમેરિકાના અનેક મોટા શહેરોમાં ટ્રમ્પના આ એક્શન વિરુદ્ધ દેખાવો શરૂ થયા છે:
- વોશિંગ્ટન ડીસી, શિકાગો અને બોસ્ટન જેવા શહેરોમાં લોકો વેનેઝુએલાના ઝંડા સાથે રસ્તા પર ઉતરી આવ્યા છે.
- પ્રદર્શનકારીઓ "No More War For Oil" ના નારા લગાવી રહ્યા છે.
- લોકોનો આરોપ છે કે અમેરિકા ફરી એકવાર કુદરતી સંસાધનો હડપવા માટે અન્ય દેશની સત્તામાં હસ્તક્ષેપ કરી રહ્યું છે.
એક તરફ ટ્રમ્પ સમર્થકો આને "અમેરિકા ફર્સ્ટ" ની નીતિ ગણાવી રહ્યા છે, તો બીજી તરફ વિરોધના આ વંટોળે અમેરિકાને બે જૂથમાં વહેંચી દીધું છે. હવે જોવાનું એ રહેશે કે માદુરોની ધરપકડ બાદ વેનેઝુએલા અને અમેરિકાના સંબંધો કેવો વળાંક લે છે.
Click it and Unblock the Notifications
Sign in with Google
