Who Is Delcy Rodriguez: કોણ છે ડેલ્સી રોડ્રિગ્ઝ? જેમના હાથમાં હવે વેનેઝુએલાની કમાન, બન્યા વચગાળાના રાષ્ટ્રપતિ
Who Is Delcy Rodriguez: દક્ષિણ અમેરિકાના દેશ વેનેઝુએલામાં અત્યારે ભારે અરાજકતાનો માહોલ છે. અમેરિકાએ એક ગુપ્ત ઓપરેશન હાથ ધરીને વેનેઝુએલાના રાષ્ટ્રપતિ નિકોલસ માદુરોને કસ્ટડીમાં લેતા વિશ્વભરમાં ખળભળાટ મચી ગયો છે. આ કટોકટી વચ્ચે દેશનું સુકાન હવે ઉપરાષ્ટ્રપતિ ડેલ્સી રોડ્રિગ્ઝના હાથમાં આવ્યું છે. સુપ્રીમ કોર્ટે તેમને દેશના વચગાળાના રાષ્ટ્રપતિ (Acting President) તરીકે નિયુક્ત કર્યા છે.
કોણ છે ડેલ્સી રોડ્રિગ્ઝ?
56 વર્ષીય ડેલ્સી રોડ્રિગ્ઝ વેનેઝુએલાના રાજકારણનું મોટું નામ છે. તેમનો જન્મ 18 મે 1969ના રોજ કારાકાસમાં થયો હતો. તેમને રાજનીતિ વારસામાં મળી છે. તેમના પિતા જોર્જ એન્ટોનિયો રોડ્રિગ્ઝ જાણીતા ડાબેરી નેતા હતા. ડેલ્સીએ વેનેઝુએલાની સેન્ટ્રલ યુનિવર્સિટીમાંથી કાયદાનો અભ્યાસ કર્યો છે અને છેલ્લા એક દાયકામાં તેઓ દેશની સૌથી શક્તિશાળી મહિલા તરીકે ઉભરી આવ્યા છે.
સત્તા સુધીની સફર
ડેલ્સી રોડ્રિગ્ઝ નિકોલસ માદુરોના સૌથી વિશ્વાસુ માનવામાં આવે છે. તેમની રાજકીય કારકિર્દી પર નજર કરીએ તો:
- 2013-14: દેશના માહિતી મંત્રી તરીકે સેવા આપી.
- 2014-17: દેશના વિદેશ મંત્રી તરીકે કાર્યભાર સંભાળ્યો.
- 2018: માદુરોએ તેમને દેશના ઉપરાષ્ટ્રપતિ બનાવ્યા.
રાજનીતિની સાથે તેઓ તેલ મંત્રાલય અને અર્થતંત્ર પર પણ મજબૂત પકડ ધરાવે છે. માદુરો તેમને 'નિડર અને ક્રાંતિકારી' નેતા ગણાવે છે.
ભાઈ-બહેનનો 'પાવર ગેમ'
વેનેઝુએલાની સત્તામાં ડેલ્સી એકલા નથી, તેમના ભાઈ જોર્જ રોડ્રિગ્ઝ પણ નેશનલ એસેમ્બલીના પ્રમુખ છે. આ ભાઈ-બહેનની જોડી માદુરો સરકારના મુખ્ય સ્તંભ ગણાય છે. હવે જ્યારે માદુરો અમેરિકાની કેદમાં છે, ત્યારે આ બંને ભાઈ-બહેન સરકાર અને દેશની અખંડિતતા જાળવવા પ્રયાસ કરી રહ્યા છે.
અમેરિકા સાથે સીધો સંઘર્ષ
વચગાળાના રાષ્ટ્રપતિ બનતા જ ડેલ્સીએ આક્રમક વલણ અપનાવ્યું છે. તેમણે ઓડિયો સંદેશ દ્વારા અમેરિકા પાસે માંગ કરી છે કે તે નિકોલસ માદુરો જીવિત હોવાના પુરાવા (Proof of Life) આપે. બીજી તરફ, અમેરિકી રાષ્ટ્રપતિ ડોનાલ્ડ ટ્રમ્પે દાવો કર્યો છે કે ડેલ્સી અમેરિકા સાથે સહયોગ કરવા તૈયાર છે, પરંતુ ડેલ્સીના નિવેદનો હાલ કંઈક અલગ જ સંકેત આપી રહ્યા છે.
શા માટે અમેરિકા અને વેનેઝુએલા વચ્ચે છે દુશ્મની?
આ વિવાદના મુખ્ય ત્રણ કારણો છે:
- તેલનો ભંડાર: વેનેઝુએલા પાસે દુનિયાનો સૌથી મોટો તેલ ભંડાર છે, જેના પર અમેરિકાની નજર હોવાનો આરોપ લાગે છે.
- ડ્રગ્સ ટ્રાફિકિંગ: અમેરિકાનો આરોપ છે કે માદુરો સરકાર અમેરિકામાં કોકેઈન જેવા નશાની તસ્કરીને પ્રોત્સાહન આપે છે.
- લોકશાહી: અમેરિકા માદુરોને એક તાનાશાહ માને છે જે લોકશાહીનો નાશ કરી રહ્યા છે.
અત્યારે આખું વિશ્વ વેનેઝુએલાની સ્થિતિ પર નજર રાખી રહ્યું છે. શું ડેલ્સી રોડ્રિગ્ઝ દેશને આ સંકટમાંથી બહાર કાઢી શકશે કે કેમ તે જોવું રહ્યું.
Click it and Unblock the Notifications
Sign in with Google
