અમેરિકાના કેલિફોર્નિયામાં ભારતીય પરિવાર મૃત હાલતમાં મળી આવ્યો, પતિ-પત્નીના શરીર પર ગોળીના નિશાન મળ્યા

અમેરિકાના કેલિફોર્નિયામાં ભારતીય પરિવારના તમામ સભ્યોના મૃતદેહ મળી આવ્યા છે. મૃતકોમાં પતિ-પત્ની 4 વર્ષના જોડિયા બાળકો છે.

અહેવાલો અનુસાર, પોલીસ આ કેસની હત્યા અને આત્મહત્યાના એંગલથી તપાસ કરી રહી છે. મૃત્યુનું કારણ હજુ સુધી જાણી શકાયું નથી. આ ઘટના કેલિફોર્નિયાના સેન માટો શહેરની છે.

સમાચારો અનુસાર, મૃતક પતિ-પત્નીની ઓળખ આનંદ સુજીત હેનરી (42) અને તેની પત્ની એલિસ પ્રિયંકા બેન્ઝિગર (40) તરીકે થઈ છે. આ મામલે તપાસ કરી રહેલા અધિકારીઓને ઘરમાં જબરદસ્તીથી પ્રવેશ કરવાના કોઈ નિશાન મળ્યા નથી.

અધિકારીઓને બાથરૂમમાં બન્ને પુખ્ત વયના લોકોના મૃતદેહ મળ્યા છે. બંને બંદૂકની ગોળીથી ઘાયલ થયેલા મળી આવ્યા છે. ઘટનાસ્થળેથી 9 એમએમની પિસ્તોલ અને લોડેડ મેગેઝિન પણ મળી આવી છે.

જોડિયા બાળકોના મૃતદેહ બેડરૂમમાંથી મળી આવ્યા. તેમના મૃત્યુનું કારણ હજુ સુધી જાણી શકાયું નથી. સૂત્રો અનુસાર, ગળું દબાવીને હત્યા કરવામાં આવી હોઈ શકે છે. ઝેર આપવામાં આવ્યું હોવાની પણ સંભાવના છે.

ઘરમાંથી કોઈ સુસાઈડ નોટ મળી નથી. તપાસ અધિકારીઓ મોતનું કારણ શોધી રહ્યા છે. આનંદ અને એલિસ બંને આઈટી પ્રોફેશનલ્સ હતા. છેલ્લા નવ વર્ષથી અમેરિકામાં રહેતા હતા. આનંદ સોફ્ટવેર એન્જિનિયર હતો અને એલિસ સિનિયર એનાલિસ્ટ હતી.

અહેવાલો અનુસાર, આનંદે ડિસેમ્બર 2016માં છૂટાછેડા માટે અરજી કરી હતી. જો કે તેણે તેને આગળ ન વધારી.

જણાવી દઈએ કે, છેલ્લા 1 મહિનામાં 7 ભારતીયોના મોત થયા છે. ગયા ડિસેમ્બરમાં મેસેચ્યુસેટ્સ રાજ્યમાં ભારતીય મૂળના પતિ-પત્ની અને તેમની 18 વર્ષની પુત્રી તેમના ઘરમાં મૃત હાલતમાં મળી આવી હતી.

English summary

Indian family found dead in California, USA