અમેરિકામાં શીખ પ્રોફેસર પર 'ઓસામા' કહી વંશીય હુમલો

Published: Tuesday, September 24, 2013, 11:09 [IST]

ન્યૂ યોર્ક, 24 સપ્ટેમ્બર: કોલંબિયા યુનિવર્સિટીના એક શીખ પ્રોફેસર પર અમેરિકામાં કેટલાક લોકોએ હુમલો કર્યો છે. હુમલો કરનારાઓ તેમને ઓસામા અને આતંકવાદી કહીને માર મારી રહ્યા હતા. પોલીસ આ કેસને વંશીય હુમલો માનીને તપાસ કરી રહી છે.

સ્કૂલ ઓફ ઇન્ટરનેશનલ એન્ડ પબ્લિક અફેયર્સના પ્રોફેસર પ્રભજોત સિંહ શનિવાર રાત્રે ડિનર બાદ પોતાની પત્ની અને એક વર્ષના પુત્રને ઘરે મૂકીને ન્યૂયોર્કની પાસે હર્લેમમાં ચક્કર લગાવી રહ્યા હતા, આ દરમિયાન તેમની પર હુમલો થયો.

પ્રભજોતના મિત્ર અને કોલંબિયા યુનિવર્સિટીના ડોક્ટરેટનો અભ્યાસ કરી રહેલા સિમરનજીત સિંહે હફપોસ્ટ વેબસાઇટ પર પ્રકાશિત પોસ્ટ 'હેટ હિટ્સ હોમ: વેન માય ફ્રેન્ડ બિકેમ એ ટાર્ગેટ'માં જણાવ્યું છે કે પ્રભજોત પર જીવલેણ હુમલા બાદ લોહીથી લથપથ હાલતમાં હોસ્પિટલમાં દાખલ કરવામાં આવ્યો. તેમનું જબડું તૂટી જવાના કારણે તેમનું મો સૂજી ગયું છે. ઘણા દાંત પણ તૂટી ગયા છે. હોસ્પિટલમાં પ્રભજોતે પોલીસને જણાવ્યું કે હુમલાખોરોએ તેમની દાઢી ખેંચી અને ઓસામા અને આતંકવાદી કહીને તેમના ચહેરા અને માથાના ભાગે ઘણીબધી વાર મુક્કાઓ માર્યા.

પ્રભજોતને હોસ્પિટલમાંથી રજા મળી ગઇ છે અને તેઓ આ કેસની તપાસ કરી રહેલી ન્યૂયોર્ક પોલીસની ડિપાર્ટમેન્ટ ઓફ હેટ ક્રાઇમ ટાસ્ક ફોર્સના ઓફિસરો સાથે સંપર્કમાં છે. પ્રભજોત પર થયેલા હુમલા બાદ 'કાઉન્સિલ ઓન અમેરિકન ઇસ્લામિક રિલેશન્સ'ની ન્યૂયોર્ક બ્રાંચે રાજનૈતિક અને ધાર્મિક નેતાઓને પૂર્વાગ્રહોથી પ્રેરિત આ ક્રાઇમ વિરુદ્ધ બોલવાની અપીલ કરી છે.

Published On September 24, 2013