રોહિત-કોહલીનો જોવા મળશે જબરદસ્ત જલવો, ઓસ્ટ્રેલિયા-વેસ્ટ ઈન્ડિઝ સહિત 4 ટીમો આવશે ભારત, શેડ્યુલ જાહેર

Indian Team Future Schedule: ભારતીય ક્રિકેટ કંટ્રોલ બોર્ડ (BCCI) એ ગુરુવારે ભારતીય પુરૂષ ટીમની આગામી 2026-27 ઘરઆંગણેની સીઝનનો સંપૂર્ણ કાર્યક્રમ જાહેર કરી દીધો છે. આ સીઝન ભારતીય ચાહકો માટે ક્રિકેટનો મહાકુંભ સાબિત થવાની છે, કારણ કે ટીમ ઈન્ડિયા પોતાના ઘરે વેસ્ટ ઈન્ડિઝ, શ્રીલંકા, ઝિમ્બાબ્વે અને ઓસ્ટ્રેલિયા જેવી દિગ્ગજ ટીમોની યજમાની કરશે. આગામી વર્ષે દક્ષિણ આફ્રિકા, ઝિમ્બાબ્વે અને નામિબિયામાં યોજાનારા 2027 વનડે વર્લ્ડ કપને ધ્યાનમાં રાખીને BCCIએ આ શેડ્યુલમાં વનડે મેચો પર વિશેષ ભાર મૂક્યો છે.

BCCIના નવા કેલેન્ડર મુજબ, આ ડોમેસ્ટિક સીઝનમાં કુલ 22 આંતરરાષ્ટ્રીય મેચો રમાશે. ખાસ વાત એ છે કે આ મેચોનું આયોજન ભારતના 17 અલગ-અલગ શહેરોમાં કરવામાં આવશે, જેનાથી દેશના ખૂણેખૂણે રહેલા ચાહકોને સ્ટેડિયમમાં બેસીને મેચ જોવાની તક મળશે. આ દરમિયાન વર્લ્ડ કપની તૈયારીના ભાગરૂપે વિશેષ રીતે 9 વનડે મેચોનો સમાવેશ કરવામાં આવ્યો છે.

2027 વર્લ્ડ કપનો રોડમેપ તૈયાર

ભારતીય ટીમ માટે વનડે વર્લ્ડ કપ 2027ની સફર આ વર્ષે જૂનમાં અફઘાનિસ્તાન સામેની 3 મેચની વનડે સિરીઝથી શરૂ થશે. ત્યારબાદ જુલાઈમાં ઈંગ્લેન્ડની ટીમ સફેદ બોલ (ODI અને T20) સિરીઝ માટે ભારતનો પ્રવાસ કરશે. ત્યારપછી જ વેસ્ટ ઈન્ડિઝ, શ્રીલંકા, ઝિમ્બાબ્વે અને ઓસ્ટ્રેલિયા સામેની ઘરઆંગણેની સીઝનનો મુખ્ય ભાગ શરૂ થશે.

ઓસ્ટ્રેલિયા અને વેસ્ટ ઈન્ડિઝનો પ્રવાસ રહેશે ખાસ

આ સીઝનનું સૌથી મોટું આકર્ષણ ઓસ્ટ્રેલિયા અને વેસ્ટ ઈન્ડિઝ સામે રમાનારી સિરીઝ હશે. BCCIએ સ્પષ્ટ કર્યું છે કે આટલા વ્યસ્ત શેડ્યુલનો ઉદ્દેશ્ય ખેલાડીઓને પૂરતી મેચ પ્રેક્ટિસ આપવી અને વર્લ્ડ કપ માટે એક મજબૂત કોર ટીમ તૈયાર કરવાનો છે.

17 શહેરોની રોટેશન પોલિસી હેઠળ નાના શહેરોના સ્ટેડિયમોને પણ આંતરરાષ્ટ્રીય મેચોની યજમાની કરવાની તક આપવામાં આવી છે. રોહિત શર્મા અને વિરાટ કોહલીનો જલવો ફરી એકવાર જોવા મળશે. કોહલી પાસે સચિન તેંડુલકરના 100 સદીના રેકોર્ડને તોડવાની સુવર્ણ તક રહેશે.

English summary

BCCI unveils the 2026-27 domestic cricket schedule for Team India. Four major teams including Australia and West Indies to visit for 22 matches across 17 cities. Road to 2027 ODI World Cup begins!