Champions Trophy 2025: 2023નો બદલો પૂરો,ઓસ્ટ્રેલિયાને હરાવીને ભારત પહોંચ્યુ ફાઈનલમાં

ઓસ્ટ્રેલિયા સામેની રોમાંચક સેમિફાઇનલ મેચમાં ભારતનો ચાર વિકેટથી વિજય થયો. ફરી એકવાર વિરાટ કોહલી 84 રન સાથે ભારત માટે સૌથી વધુ રન બનાવનાર ખેલાડી રહ્યો.

ભારત હવે 9 માર્ચે દુબઈના મેદાન પર ફાઇનલ મેચ રમવા જઈ રહ્યું છે. ભારતનો મુકાબલો ફાઇનલમાં બીજા સેમિફાઇનલના વિજેતા સાથે થશે. દક્ષિણ આફ્રિકા અને ન્યુઝીલેન્ડ વચ્ચેની વિજેતા ટીમ ફાઇનલમાં ભારત સામે ટકરાશે.

સ્ટીવ સ્મિથ અને એલેક્સ કેરીની અડધી સદીની મદદથી ઓસ્ટ્રેલિયાએ ભારત માટે પડકારજનક સ્કોર બનાવ્યો. જોકે, ભારતના બોલરોએ સારી બોલિંગ કરી અને ઓસ્ટ્રેલિયાને 264 રન સુધી રોકી દીધું.

મોહમ્મદ શમી ત્રણ વિકેટ સાથે સૌથી સફળ બોલર રહ્યો જ્યારે વરુણ ચક્રવર્તી અને રવિન્દ્ર જાડેજાએ પણ સારી બોલિંગ કરીને બે-બે વિકેટ લીધી.

મોહમ્મદ શમીએ કોનોલીને આઉટ કરીને ભારતને શરૂઆતી સફળતા અપાવી, ત્યારબાદ વરુણ ચક્રવર્તીએ હેડને આઉટ કરીને બીજી મહત્વપૂર્ણ વિકેટ લીધી. સ્મિથ અને લાબુશેન વચ્ચેની ભાગીદારી ઓસ્ટ્રેલિયા માટે મહત્વપૂર્ણ હતી પરંતુ ભારતે વિકેટો લઈને દબાણ જાળવી રાખ્યું.

સ્મિથ આઉટ થયા પછી, એલેક્સ કેરીએ આક્રમક બેટિંગ કરીને પરિસ્થિતિને સંભાળવાનો પ્રયાસ કર્યો. અંતિમ ઓવરોમાં ભારતીય બોલરોની શાનદાર બોલિંગે મેચની દિશા બદલી નાખી. જ્યારે કેરી રમી રહ્યા હતા, ત્યારે એવું લાગતું હતું કે ઓસ્ટ્રેલિયા એક મોટો સ્કોર બનાવશે પરંતુ ભારતીય બોલરોએ દબાણ જાળવી રાખ્યું અને વિકેટ લેવામાં સફળ રહ્યા.

કેરીનું આઉટ થવું ભારત માટે એક ટર્નિંગ પોઈન્ટ સાબિત થયું કારણ કે ઓસ્ટ્રેલિયા મોટો સ્કોર કરવામાં નિષ્ફળ ગયું અને 264 રનમાં ઓલઆઉટ થઈ ગયું.