સ્મૃતિ મંધાના-પલાશ મુચ્છલના લગ્નની નવી તારીખ જાહેર, જાણો ક્યારે અને ક્યાં થશે લગ્ન?

ભારતની સ્ટાર ક્રિકેટર સ્મૃતિ મંધાના અને પલાશ મુચ્છલના લગ્નની નવી તારીખ આખરે નક્કી થઈ ગઈ છે. અગાઉ ૨૩ નવેમ્બરે સ્મૃતિના પિતાની અસ્વસ્થતાને કારણે લગ્ન રદ કરાયા હતા, ત્યારબાદ પલાશને પણ હોસ્પિટલમાં દાખલ કરાયા હતા. હવે આ જોડી ૭ ડિસેમ્બરે સાત ફેરા લેવા જઈ રહી છે.

પરિવારમાં હવે સ્વાસ્થ્ય સંબંધિત બધું બરાબર થયા બાદ બંને પક્ષોએ આ તારીખને અંતિમ સ્વરૂપ આપ્યું છે. ચાહકો અને મિત્રો આ જોડીને એક થતા જોવા માટે લાંબા સમયથી ઉત્સુકતાપૂર્વક રાહ જોઈ રહ્યા હતા, ખાસ કરીને ગત લગ્ન રદ થયા પછી તેમની ઉત્સુકતા વધુ વધી હતી.

અહેવાલો અનુસાર, ખુદ પલાશ મુચ્છલે જ લગ્નની આ નવી તારીખની માહિતી આપી છે. આયોજન અનુસાર, આ વખતે લગ્નમાં અગાઉ કરતાં ઓછા મહેમાનો સામેલ થશે અને ગેસ્ટ લિસ્ટ નાનું કરાયું છે. બંને સાંઘલીમાં સાત ફેરા લેશે.

આ લગ્ન સમારોહમાં ફક્ત પરિવારના નજીકના સભ્યો અને ખાસ મિત્રોને જ આમંત્રિત કરાયા છે. તાજેતરમાં પલાશ મુચ્છલ તેમના પરિવાર સાથે એરપોર્ટ પર જોવા મળ્યા હતા, જ્યાં તેઓ શાંત અને મૌન રહ્યા તથા વાતચીત કરવાનું ટાળ્યું હતું. અગાઉ સોશિયલ મીડિયા પર તેમના લગ્નને લઈને ઘણી ચર્ચાઓ ચાલી હતી, જેમાં મેરી ડી'કોસ્ટા નામની યુવતી દ્વારા વાયરલ કરાયેલી કથિત ચેટના કારણે પણ હોબાળો થયો હતો.

આ ઘટનાક્રમ પછી પલાશને સોશિયલ મીડિયા પર ખૂબ ટ્રોલ કરાયા હતા અને તેમને 'ચીટર' કહેવાયા હતા. જો કે, પલાશની માતાએ ત્યારે ખાતરી આપી હતી કે લગ્ન ટૂંક સમયમાં જ થશે. સ્મૃતિના પરિવારે આ મામલે ક્યારેય કોઈ નિવેદન આપ્યું ન હતું. સ્મૃતિના પિતાને હોસ્પિટલમાંથી રજા મળ્યા બાદ, સૌની નજર લગ્નની નવી તારીખ પર હતી, જે હવે નક્કી થઈ ગઈ છે.

English summary

Smriti Mandhana and Palash Muchchal have finalised their wedding date for December after prior postponement due to family health concerns. The ceremony will be intimate, with a small guest list and seven pheras, reflecting a low-key celebration with close family and friends.