T20 World Cup 2026 : આખરે ઘુંટણીએ પડ્યુ પાકિસ્તાન, ભારત સામે મેચ રમવા તૈયાર

By Desk

Updated: Tuesday, February 10, 2026, 8:48 [IST]

લાંબી ખેંચતાણ અને અનેક બેઠકોના અંતે પાકિસ્તાને નરમ વલણ અપનાવ્યું છે. હવે ભારત અને પાકિસ્તાન વચ્ચેનો હાઈ-વોલ્ટેજ ડ્રામા 15 ફેબ્રુઆરીએ નિર્ધારિત સમયે જ યોજાશે.

પાકિસ્તાન સરકારે સોમવારે આ મેચ માટે લીલી ઝંડી આપી દીધી છે. આ નિર્ણય સાથે જ છેલ્લા ઘણા સમયથી ચાલી રહેલી અનિશ્ચિતતાનો સુખદ અંત આવ્યો છે.

શરૂઆતમાં પાકિસ્તાને સરકારની સલાહને ટાંકીને ભારત સામે રમવાનો સ્પષ્ટ ઇનકાર કર્યો હતો. આ જીદને કારણે સમગ્ર T20 વર્લ્ડ કપના આયોજન પર જોખમ ઊભું થયું હતું.

ક્રિકેટ ચાહકોમાં મેચ રદ થવાની ભીતિ સેવાઈ રહી હતી, જેની અસર ટુર્નામેન્ટ પર પડવાની હતી. જોકે, આંતરરાષ્ટ્રીય ક્રિકેટ કાઉન્સિલ (ICC) એ આ મામલે મધ્યસ્થી કરી હતી.

ICC એ કડક વલણ અપનાવીને પાકિસ્તાન સાથે ઉચ્ચ સ્તરીય કૂટનીતિક વાટાઘાટો હાથ ધરી હતી. બાંગ્લાદેશ ક્રિકેટ બોર્ડ અને અન્ય દેશોના દબાણ બાદ પાકિસ્તાન નમતું જોખ્યું છે.

PCB ચેરમેન મોહસિન નકવીએ આ મુદ્દે વડાપ્રધાન શાહબાઝ શરીફ સાથે વિગતવાર ચર્ચા કરી હતી. તમામ પાસાઓની સમીક્ષા કર્યા બાદ ટીમને મેદાનમાં ઉતરવાની મંજૂરી મળી છે.

લાહોરમાં યોજાયેલી મહત્વપૂર્ણ બેઠકમાં પાકિસ્તાને કેટલીક આકરી શરતો ICC સામે રજૂ કરી હતી. જોકે, ICC એ પાકિસ્તાની બોર્ડની મોટાભાગની શરતો સ્વીકારવાનો ઇનકાર કર્યો હતો.

શરતો મંજૂર ન થતા આખરે PCB એ પોતાનું વલણ હળવું કરી મેચ રમવા સંમતિ આપી. BCB ના પ્રતિનિધિઓએ પણ આ મડાગાંઠ ઉકેલવામાં મહત્વની ભૂમિકા ભજવી હતી.

ભારત અને પાકિસ્તાન વચ્ચેનો મુકાબલો આર્થિક દૃષ્ટિએ પણ ખૂબ જ મહત્વનો ગણાય છે. મેચ રદ થવાથી બ્રોડકાસ્ટર્સ અને બોર્ડને કરોડોનું નુકસાન થવાની પૂરી શક્યતા હતી.

હવે આ મેચ રમાવાની હોવાથી સમગ્ર ક્રિકેટ જગતે રાહતનો શ્વાસ લીધો છે. લાહોર બેઠકમાં દ્વિપક્ષીય શ્રેણી અંગે પણ ચર્ચાઓ થઈ હતી જે અત્યારે સ્થગિત છે.

ICC એ સ્પષ્ટ કર્યું છે કે ભારત આવવાનો ઇનકાર કરવા બદલ બાંગ્લાદેશ પર દંડ નહીં થાય. સુરક્ષાના કારણોસર બાંગ્લાદેશે પ્રવાસ ન કરવાનો નિર્ણય અગાઉ લીધો હતો.

બાંગ્લાદેશના સમર્થનમાં પાકિસ્તાને ભારત સામેની મેચનો બહિષ્કાર કરવાની જે ધમકી આપી હતી તે હવે ટળી છે. ICC એ તમામ વહીવટી અને આર્થિક વિવાદો થાળે પાડ્યા છે.

નવા કરાર મુજબ બાંગ્લાદેશને 2028 થી 2031 વચ્ચે ICC ની મોટી ટુર્નામેન્ટની યજમાની મળી શકે છે. આ નિર્ણયથી એશિયન ક્રિકેટ બોર્ડ વચ્ચેના સંબંધોમાં સુધારો જોવા મળશે.