IPL 2025 : કોણ છે આઈપીએલમાં ધમાકેદાર ડેબ્યુ કરનારો ઝીશાન અંસારી?

IPL 2025 : સનરાઇઝર્સ હૈદરાબાદે દિલ્હી કેપિટલ્સ સામે ટોસ જીતીને પ્રથમ બેટિંગ કરવાનો નિર્ણય કર્યો છે. આ મુકાબલા માટે સનરાઇઝર્સે પ્લેઇંગ-11માં એક ફેરફાર કર્યો છે.

હૈદરાબાદે ઝીશાન અંસારીને ટીમમાં સામેલ કર્યો છે. બીજી તરફ દિલ્હી કેપિટલ્સે પણ ફેરફાર કરતાં સમીર રિઝવીની જગ્યાએ કેએલ રાહુલને તક આપી છે.

ઝીશાન અંસારી IPL 2025ની હરાજીમાં 40 લાખ રૂપિયામાં સનરાઇઝર્સ હૈદરાબાદ સાથે જોડાયો છે. ફ્રેન્ચાઇઝીની માલિક કાવ્યા મારને તેની પ્રતિભા પર વિશ્વાસ દર્શાવ્યો અને ઝીશાનને દિલ્હી સામેની પ્લેઇંગ ઈલેવનમાં સ્થાન મળ્યું છે.

ઝીશાન અંસારી ઉત્તર પ્રદેશ અને ભારત અંડર-19 માટે રમ્યો છે. તેણે 5 ફર્સ્ટ ક્લાસ મેચોમાં 17 વિકેટ લીધી છે. 2017ના રણજી ટ્રોફી ડેબ્યૂમાં ઉત્તમ પ્રદર્શન કરીને તેની પસંદગીને ન્યાય આપ્યો હતો.

ઉત્તર પ્રદેશ T-20 લીગમાં પણ ઝીશાને 7 મેચોમાં 7.09ની ઇકોનોમી સાથે 17 વિકેટ હાંસલ કરી હતી. 2016ના અંડર-19 વર્લ્ડ કપમાં ભારતીય ટીમનો હિસ્સો બનેલો ઝીશાન હવે ભારતીય ટીમ માટે મહેનત કરશે.

બોલિંગમાં રસ ધરાવતા ઝીશાને તેના કોચ ગોપાલ સિંહ પાસેથી ગુગલી બોલિંગ શીખી. શેન વોર્નના યૂટ્યુબ વિડિઓઝ જોઈને તેની કુશળતાને વધુ વિકસાવી. યુપી T-20 લીગમાં કાનપુર સુપરસ્ટાર્સ સામે 5 વિકેટ હાંસલ કરીને પોતાની બોલિંગ કળા સાબિત કરી ચુક્યો છે.

ઝીશાન અંસારીના પિતા નઈમ અંસારી લખનૌમાં ટેલરિંગની દુકાન ચલાવતા હતા. આર્થિક સંકડામણ વચ્ચે પણ ઝીશાને સખત મહેનત અને પ્રતિભાના આધારે પોતાની આગવી ઓળખ બનાવી છે.

ઝીશાન અંસારી માટે IPL 2025 એક મોટો પ્લેટફોર્મ સાબિત થઈ શકે છે. સનરાઇઝર્સ હૈદરાબાદની ટીમે તેના પર વિશ્વાસ દર્શાવ્યો છે, હવે તે તેની પ્રતિભા સાબિત કરી શકે છે.

English summary

IPL 2025: Who is Zeeshan Ansari, the sensational debutant in IPL?