IPL 2025: મુંબઈ ઈન્ડિયન્સને મોટો ફટકો, જસપ્રીત બુમરાહ નહીં કરી શકે બોલિંગ? રિપોર્ટમાં થયો ખુલાસો

ચાહકો ઇન્ડિયન પ્રીમિયર લીગ (IPL) ની 2025 સીઝનની શરૂઆતની આતુરતાથી રાહ જોઈ રહ્યા છે. ટુર્નામેન્ટની આગામી સીઝન 22 માર્ચથી શરૂ થશે. શરૂઆતની મેચમાં ડિફેન્ડિંગ ચેમ્પિયન કોલકાતા નાઈટ રાઈડર્સનો મુકાબલો ઈડન ગાર્ડન્સ ખાતે રોયલ ચેલેન્જર્સ બેંગ્લોર (KKR vs RCB) સામે થશે.

પાંચ વખતની ચેમ્પિયન મુંબઈ ઈન્ડિયન્સને બહુપ્રતિક્ષિત સિઝન પહેલા મોટો ફટકો પડી શકે છે કારણ કે તેમના સ્ટાર ફાસ્ટ બોલર જસપ્રીત બુમરાહ શરૂઆતની કેટલીક મેચોમાંથી બહાર થઈ શકે છે.31 વર્ષીય આ ઝડપી બોલર હાલમાં જાન્યુઆરીમાં ઓસ્ટ્રેલિયા સામે બોર્ડર-ગાવસ્કર ટ્રોફી દરમિયાન થયેલી કમરની ઇજામાંથી સ્વસ્થ થઈ રહ્યો છે.

ટાઇમ્સ ઓફ ઇન્ડિયાના એક અહેવાલ મુજબ, બુમરાહ સાવચેતીના પગલા તરીકે મુંબઈ ઇન્ડિયન્સની પ્રથમ બે થી ત્રણ મેચ ગુમાવે તેવી શક્યતા છે.

TOIના અહેવાલમાં BCCIના એક સૂત્રને ટાંકીને કહેવામાં આવ્યું છે કે, 'બુમરાહનો મેડિકલ રિપોર્ટ ઠીક છે.' તેણે COE ખાતે બોલિંગ ફરી શરૂ કરી દીધી છે. જોકે, આગામી બે અઠવાડિયામાં આઈપીએલની શરૂઆતમાં તે બોલિંગ કરી શકશે તેવી શક્યતા ઓછી છે. હાલની પરિસ્થિતિ મુજબ, એપ્રિલનો પહેલું અઠવાડિયું તેના માટે ક્રિકેટમાં પાછા ફરવા માટે વધુ વાસ્તવિક તારીખ લાગે છે.

તેમણે કહ્યું કે તબીબી ટીમ ધીમે ધીમે તેમના કાર્યભારમાં વધારો કરશે. જ્યાં સુધી તે થોડા દિવસો સુધી કોઈપણ પ્રકારની અગવડતા વગર સંપૂર્ણ બોલિંગ કરી શકશે નહીં, ત્યાં સુધી તેને મેડિકલ ટીમ દ્વારા ક્લિયર કરવામાં આવે તેવી શક્યતા ઓછી છે.

BCCI અને NCA મેનેજમેન્ટે એ પણ સંકેત આપ્યો છે કે IPL 2025 પછી ઇંગ્લેન્ડ પ્રવાસને ધ્યાનમાં રાખીને બુમરાહ અને મોહમ્મદ શમી બંનેની ફિટનેસનું ધ્યાન રાખવામાં આવશે. અહેવાલમાં સૂત્રોના હવાલાથી કહેવામાં આવ્યું છે કે શમી અને બુમરાહ આઈપીએલમાં કેવું પ્રદર્શન કરે છે તે મહત્વનું રહેશે.

શમી પર સતત નજર રાખવામાં આવી રહી છે. જો પસંદગીકારો બંનેને બે-ત્રણ ટેસ્ટ માટે એકસાથે લાવે તો તે એક આદર્શ પરિસ્થિતિ હશે. ટીમ મેનેજમેન્ટ બંનેને બધી ટેસ્ટ એકસાથે રમવા માટે દબાણ કરવાથી પણ સાવચેત રહેશે.