Rohit Sharmaએ તોડ્યો પોતાનો જ સૌથી ઝડપી સદીનો રેકોર્ડ, ડેવિડ વોર્નરની બરાબરી કરીને રચ્યો ઈતિહાસ

Rohit Sharma, World Record: ભારતીય ક્રિકેટ ટીમના કેપ્ટન રોહિત શર્માએ ફરી એકવાર સાબિત કરી દીધું છે કે તેને કેમ 'હિટમેન' તરીકે ઓળખવામાં આવે છે. વિજય હજારે ટ્રોફીમાં સિક્કિમ સામે રમાયેલી મેચમાં રોહિત શર્માએ બેટિંગના એવા રેકોર્ડ્સ બનાવ્યા છે કે જેણે ક્રિકેટ જગતને સ્તબ્ધ કરી દીધું છે. લગભગ 7 વર્ષ પછી ઘરેલું ક્રિકેટમાં વાપસી કરતા રોહિતે જયપુરના સવાઈ માનસિંહ સ્ટેડિયમમાં રનનો વરસાદ કર્યો હતો.

ડેવિડ વોર્નરના વર્લ્ડ રેકોર્ડની કરી બરાબરી

સિક્કિમ સામે 155 રનની વિસ્ફોટક ઈનિંગ રમીને રોહિત શર્માએ ઓસ્ટ્રેલિયાના પૂર્વ ઓપનર ડેવિડ વોર્નરના એક મોટા વર્લ્ડ રેકોર્ડની બરાબરી કરી લીધી છે. હવે લિસ્ટ-એ (50 ઓવર ફોર્મેટ) ક્રિકેટમાં રોહિત શર્માના નામે 9 વખત 150થી વધુ રન બનાવવાનો રેકોર્ડ નોંધાયો છે. રોહિતે આ પહેલા ભારત માટે વન-ડેમાં 8 વખત 150+ રન બનાવ્યા છે, જ્યારે 150 રનનો આ 9મો આંકડો તેણે મુંબઈ માટે રમતા હાંસલ કર્યો છે. વોર્નરે 210 મેચોમાં 9 વખત આ સિદ્ધિ મેળવી હતી.

પોતાની જ કારકિર્દીની સૌથી ફાસ્ટ સદી

રોહિત શર્માએ આ મેચમાં માત્ર 62 બોલમાં પોતાની સદી પૂરી કરી હતી. આ રોહિતના કરિયરની સૌથી ઝડપી સદી છે. અગાઉ 2023ના વર્લ્ડ કપમાં અફઘાનિસ્તાન સામે તેણે 63 બોલમાં સદી ફટકારી હતી.

• કુલ રન: 94 બોલમાં 155 રન.
• ચોગ્ગા-છગ્ગા: 18 ચોગ્ગા અને 9 છગ્ગા.
• સ્ટ્રાઈક રેટ: 164.89.

38 વર્ષની વયે રચ્યો ઈતિહાસ

38 વર્ષ અને 238 દિવસની ઉંમરે સદી ફટકારીને રોહિત વિજય હજારે ટ્રોફીના ઈતિહાસમાં સદી ફટકારનાર બીજો સૌથી મોટી ઉંમરનો ખેલાડી બની ગયો છે. આ યાદીમાં પ્રથમ ક્રમે બંગાળનો અનુસ્તૂપ મજુમદાર (39 વર્ષ) છે.

બેવડી સદીના બાદશાહ

નોંધનીય છે કે રોહિત શર્મા વિશ્વનો એકમાત્ર એવો બેટ્સમેન છે જેના નામે લિસ્ટ-એ ક્રિકેટમાં ત્રણ બેવડી સદી (264, 209 અને 208*) નોંધાયેલી છે. તેની આક્રમક બેટિંગે ફરી એકવાર બતાવી દીધું છે કે આગામી મર્યાદિત ઓવરોની શ્રેણી માટે તે સંપૂર્ણ ફોર્મમાં છે.

English summary

Rohit Sharma breaks his own record by smashing a 62-ball century in Vijay Hazare Trophy. Equals David Warner's record of nine 150+ scores in List A.