GT vs RCB: તેવટિયા ફરી ફિનિશર સાબિત થયો, મિલર સાથે મળી ગુજરાતને 6 વિકેટે જીતાડ્યું!
ગુજરાત ટાઈટન્સની ટીમે વધુ એક મેચ શાનદાર રીતે જીતીને પોતાનું સાતત્યપૂર્ણ પ્રદર્શન બતાવ્યું છે. આરસીબી સામેની આ મેચમાં ટાઇટન્સની ટીમે 19.3 ઓવરમાં 171 રનનો લક્ષ્યાંક હાંસલ કર્યો હતો.
મુંબઈ, 30 એપ્રિલ : ગુજરાત ટાઈટન્સની ટીમે વધુ એક મેચ શાનદાર રીતે જીતીને પોતાનું સાતત્યપૂર્ણ પ્રદર્શન બતાવ્યું છે. આરસીબી સામેની આ મેચમાં ટાઇટન્સની ટીમે 19.3 ઓવરમાં 171 રનનો લક્ષ્યાંક હાંસલ કર્યો હતો. રાહુલ તેવટિયાએ ફરી જીતમાં મહત્વની ભૂમિકા ભજવી હતી અને ડેવિડ મિલરે પણ વિજયમાં મહત્વની ભૂમિકા ભજવી હતી, જેના પરિણામે ગુજરાતે 6 વિકેટે મેચ જીતી લીધી હતી.
RCB દ્વારા નિર્ધારિત 171 રનના લક્ષ્યાંકનો પીછો કરતા ગુજરાતે સારી શરૂઆત કરી હતી. રિદ્ધિમાન સાહા અને શુભમન ગિલની જોડીએ પ્રથમ વિકેટ માટે 51 રન જોડ્યા હતા. જો કે તે ઝડપી શરૂઆત ન હતી પરંતુ તે નક્કર હતી. ગયા મેચમાં તોફાની અડધી સદી ફટકારનાર સાહા આ વખતે 22 બોલમાં 29 રન બનાવીને હસરંગાનો શિકાર બન્યો હતો.
આ મેચમાં પોતાની 100મી આઈપીએલ મેચ રમી રહેલો હાર્દિક પંડ્યા કંઈ ખાસ કરી શક્યો ન હતો અને માત્ર 3 રન બનાવીને શાહબાઝ અહેમદના બોલ પર કેચ આઉટ થયો હતો. શુભમન ફરી એકવાર મોટી ઇનિંગ રમી શક્યો ન હતો અને 31 રન બનાવીને આઉટ થયો હતો. તેની વિકેટ શાહબાઝ અહેમદે લીધી હતી.
બેંગલુરુ માટે આ મેચમાં સૌથી વધુ રન વિરાટ કોહલીના બેટથી આવ્યા હતા. તેણે 53 બોલમાં 58 રનની ઇનિંગ રમી હતી. આ સાથે જ રજત પાટીદારે 52 રન બનાવ્યા હતા. ગુજરાત તરફથી પ્રદીપ સાંગવાને સૌથી વધુ વિકેટ લીધી હતી. IPL 2022માં પ્રથમ મેચ રમી રહેલા આ ખેલાડીએ 4 ઓવરમાં 19 રન આપીને બે વિકેટ ઝડપી હતી. મેક્સવેલે પણ આ મેચમાં શાનદાર ઇનિંગ રમી હતી અને માત્ર 18 બોલમાં 33 રન બનાવ્યા હતા.
આજની મેચમાં કાર્તિકનું બેટ ચાલ્યું ન હતું અને તે માત્ર 2 રન બનાવીને આઉટ થયો હતો. મહિપાલ લોમરોરે પણ મેચની છેલ્લી ઓવરમાં ઝડપી રન બનાવ્યા અને તેના બેટમાંથી 8 બોલમાં 16 રન આવ્યા.