IPL-6: પોતાની છેલ્લી મેચમાં પણ પૂણે સામે હાર્યું દિલ્હી

Updated: Monday, May 20, 2013, 12:00 [IST]

પૂણે, 20 મે : કપ્તાન એરોન ફિંચ (52)ની શાનદાર અર્ધસદી અને અલી મુર્તજા (15/3) તથા એંજેલો મેથ્યૂજ (14/3)ની ઉમદા બોલિંગના જોરે પૂણે વોરિયર્સ ઇન્ડિયાની ટીમે રવિવારે સુબ્રત રાય સહારા સ્ટેડિયમમાં રમાયેલ આઇપીએલની 71મી અને પોતાની છેલ્લી મેચમાં દિલ્હી ડેરડેવિલ્સને 38 રને હરાવી દિધું.

આ જીતની સાથે વોરિયર્સે 9 ટીમોની લીસ્ટમાં આઠમાં ક્રમ પર રહેતા આઇપીએલ-6નું સમાપન કર્યું જ્યારે ગયા વર્ષે શાનદાર રમતનું પ્રદર્શન કરનાર દિલ્હીની ટીમ આ વખતે કાઠું કાઢી શકી નહી.

પૂણેએ દિલ્હીની સામે જીત માટે 173 રનનું લક્ષ્ય મૂક્યું હતું પરંતુ દિલ્હીના જાંબાજ નિર્ધારિત 20 ઓવરમાં 9 વિકેટ પર 134 રન જ બનાવી શક્યા. તેમાં સર્વાધિક યોગદાન મુરલીધરન ગૌતમનું રહ્યું જેણે 30 રન બનાવ્યા. દિલ્હીની આ 16 મેચોમાં 13મી હાર છે જ્યારે પૂણેને આટલી જ મેચોમાં ચોથી જીત મળી છે.