IPL-6 : કોલકાતા નાઇટ રાઇડર્સની પૂણે વોરિયર્સ પર સરળ જીત

Updated: Friday, May 10, 2013, 12:24 [IST]

પૂણે, 10 મે: કપ્તાન ગૌતમ ગંભીર 50ની શાનદાર અર્ધસદી અને લક્ષ્મીપતિ બાલાજીની શાનદાર 3 વિકેટના જોરે તેમજ ટીમના બોલરોના શાનદાર પ્રદર્શનના કારણે કોલકાતા નાઇટ રાઇડર્સની ટીમે ગુરુવારે સુબ્રોતો રોય સહારા સ્ટેડિયમમાં રમાયેલ આઇપીએલના છના 56માં મુકાબલામાં પૂણે વોરિયર્સ ઇન્ડિયાને 46 રનોથી હરાવી દીધું. આ જીત છતા નાઇટ રાઇડર્સ સાતમાં ક્રમ પર જ કાયમ છે.

નાઇટ રાઇડર્સ દ્વારા આપવામાં આવેલ 153 રનોના લક્ષ્યનો પીછો કરતા વોરિયર્સ 19.3 ઓવરમાં પોતાની બધી વિકેટ ગુમાવી માત્ર 106 રન જ બનાવી શકી. એજેલો મેથ્યુઝે સૌથી વધારે 40 રન બનાવ્યા જ્યારે રોબિન ઉથપ્પાએ 31 રનોનું યોગદાન આપ્યું. નાઇટ રાઇડર્સ તરફથી લક્ષ્મીપતિ બાલાજીએ ત્રણ વિકેટ માટે જ્યારે ઇકબાલ અબ્દુલ્લા, સુનીલ નરેન અને જેક્સ કૈલિસને બે-બે સફળતા મળી. ગંભીરને મેન ઓફ ધ મેચ જાહેર કરવામાં આવ્યો.

સતત આઠમી હારને ટાળવાનો પ્રયાસ કરવા વોરિયર્સની શરુઆત ખરાબ રહી. 20 રનના કુલ યોગદાન પર કપ્તાન એરોન ફિંચ 5 રન પર જેક્સ કૈલિસના બોલ પર બોલ્ડ થઇ ગયો. ત્યારબાદ પૂણેની ટીમની વિકેટ પડવાનો દૌર શરૂ થઇ ગયો અને તેના ધુરંધરો સસ્તામાં પેવેલિયનભેગા થઇ ગયા. જોત જોતામાં આખી ટીમ પેવેવિયનભેગી થઇ ગઇ.