વિદેશી ધરતી પર સૌથી ફ્લોપ ટેસ્ટ કેપ્ટન રહ્યા ધોની
નવી દિલ્હી, 3 જાન્યુઆરી: મહેન્દ્ર સિંહ ધોનીએ ભલે ભારતીય ક્રિકેટ ટીમને એક નવી ઉંચાઇ પર પહોંચાડવામાં મહત્વની ભૂમિકા ભજવી હોય. પરંતુ એ પણ સત્ય છે કે ભારતીય ટેસ્ટ ક્રિકેટના ઇતિહાસમાં વિદેશી જમીન પર આજ સુધી કોઇ પણ કપ્તાનનો રેકોર્ડ એટલો ખરાબ નથી રહ્યો જેટલો ધોની રહ્યો છે.
વિદેશી ધરતી પર રમવામાં આવેલી છેલ્લી 4 ટેસ્ટ સીરીઝના આંકડા પર નજર કરીએ તો 2011માં વર્લ્ડકપ જીત્યા બાદથી અત્યાર સુધી ટીમ ઇન્ડિયાએ દેશની બહાર 13 ટેસ્ટ મેચ રમી છે. જેમાંથી માત્ર એક જ મેચમાં જીત હાસલ કરી છે. ટીમને 9 મેચમાં હારનો સામનો કરવો પડ્યો છે જ્યારે 3 મેચ ડ્રો રહી છે. આ મેચમાં ભારતની જીતની ટકાવારી 7.69 ટકા રહી છે, જ્યારે હારની ટકાવારી 69.23 ટકા રહી છે.
આ 13 મેચોમાંથી 11માં રાહુલ દ્રવિડ ટીમમાં હતા અને તેમણે સૌથી વધારે 906 રન બનાવ્યા, જ્યારે ઇશાંત શર્માએ સૌથી વધારે 42 વિકેટ ઝડપી. વેસ્ટઇન્ડિઝ, ઇંગલેન્ડ, ઓસ્ટ્રેલિયા અને સાઉથ આફ્રિકાના પ્રવાસ દરમિયાન રમાયેલી આ તમામ મેચોમાં વિરાટ કોહલી અને ધોની ટીમમાં સામેલ હતા. કોહલીએ આ મેચમાં 648 રન બનાવ્યા અને ધોનીએ 506 રન બનાવ્યા.
ધોની બ્રિગેડ ન્યૂઝીલેન્ડ પ્રવાસ પર શું ચમત્કાર કરી શકે છે તે તો આવનાર દિવસોમાં જ ખબર પડશે. પરંતુ દેશના સૌથી સફળ કપ્તાન માનવામાં આવતા ધોની પર વિદેશી ધરતી પર સૌથી ખરાબ કપ્તાન હોવાની મહોર વાલી ગઇ છે.