બીજી ટેસ્ટ ડ્રો, ભારતનો 0-1થી શ્રેણી પરાજય

Updated: Tuesday, July 15, 2014, 12:56 [IST]

વેલિંગ્ટન, 18 ફેબ્રુઆરીઃ વનડે બાદ ભારતીય ક્રિકેટ ટીમે ન્યુઝીલેન્ડ સામે ટેસ્ટ શ્રેણી પણ ગુમાવી દીધી છે. વેલિંગ્ટન ખાતે રમાયેલી ટેસ્ટમાં ભારત પર હારનો ખતરો મંડરાઇ રહ્યો હતો, પરંતુ વિરાટ કોહલીએ ઉત્કૃષ્ઠ સદી ફટકારીને ટીમની લાજ બચાવી લીધી હતી, જો કે ટેસ્ટને ડ્રો થતી અટકાવી શક્યો નહોતો. બન્ને સુકાનીની સહમતિથી આ ટેસ્ટને ડ્રો જાહેર કરી દેવામાં આવી હતી. આ સાથે જ ભારતે ન્યુઝીલેન્ડ સામે ટેસ્ટ શ્રેણી 0-1થી ગુમાવી દીધી હતી. બીજી ઇનિંગમાં ભારત તરફથી વિરાટ કોહલીએ 105 અને રોહિત શર્માએ 31 રનની ઇનિંગ રમી હતી. જ્યારે ન્યુઝીલેન્ડ તરફથી સાઉથીએ બે અને બોલ્ટે એક વિકેટ મેળવી હતી. મેક્કુલમને શાનદર ત્રેવડી સદી ફટકારવા બદલ મેન ઓફ ધ મેચ જાહેર કરવામાં આવ્યો હતો.

આ પહેલા બીજી ઇનિંગમાં ન્યુઝીલેન્ડની બેટિંગ પર નજર ફેરવવામાં આવે તો મેક્કુલમે 302, નીશામે 137, વોટ્લિંગે 124, રુદરફોર્ડે 35, લાથમે 29, સાઉથીએ 11 રન ફટકાર્યા હતા. જ્યારે ભારત તરફથી ઝહીર ખાને 5, મોહમ્મદ શમીએ 2 અને જાડેજાએ એક વિકેટ મેળવી હતી. ન્યુઝીલેન્ડે બીજી ઇનિંગમાં 680 રન બનાવી ભારત સામે 435 રનનો લક્ષ્યાંકમ મુક્યો હતો. જેના જવાબમાં ભારતે બીજી ઇનિંગમાં ત્રણ વિકેટ ગુમાવીને 166 રન બનાવ્યા હતા, અને બન્ને સુકાનીઓની સહમતિથી મેચને ડ્રો જાહેર કરવામાં આવી હતી. ભારત તરફથી ઇનિંગની શરૂઆત મુરલી વિજય અને શિખર ધવને કરી હતી. જો કે, બન્ને સસ્તામાં આઉટ થઇ ગયા હતા, ચેતેશ્વર પૂજારા પણ કોઇ ખાસ કમાલ દર્શાવી શક્યો નહોતો. શિખર ધવને 2, મુરલી વિજયે 7 અને પૂજારાએ 17 રન બનાવ્યા હતા.

ન્યુઝીલેન્ડની પહેલી ઇનિંગ
ન્યુઝીલેન્ડની પહેલી ઇનિંગ અંગે વાત કરવામાં આવે તો ન્યુઝીલેન્ડે પહેલી ઇનિંગમાં 192 રન બનાવ્યા હતા, જેમાં વિલિયમ્સને 47, નીશામે 33, સાઉથીએ 32, ફુલ્ટોને 13, રુદરફોર્ડે 12, એન્ડરસને 24 રન બનાવ્યા હતા, જ્યારે ભારત તરફથી ઇશાંત શર્માએ છ અને મોહમ્મદ શમીએ 4 વિકેટ મેળવી હતી.

ભારતની પહેલી ઇનિંગ
ભારતની પહેલી ઇનિંગ અંગે વાત કરવામાં આવે તો ભારતે પહેલી ઇનિંગમાં 438 રન બનાવ્યા હતા. જેમાં ધવને 98, પૂજારાએ 19, ઇશાંત શર્માએ 29, કોહલીએ 38, રહાણેએ 118, ધોનીએ 68, જાડેજાએ 26 અને ઝહીર ખાને 22 રન ફટકાર્યા હતા. જ્યારે ન્યુઝીલેન્ડ તરફથી બોલ્ટ, સાઉથી અને વેન્ગરે ત્રણ-ત્રણ વિકટે લીધી હતી અને નીશામે એક વિકેટ ઝડપી હતી.