T20 WC : બાંગ્લાદેશ સેમીફાઈનલની રેસમાંથી બહાર, છેલ્લી ઓવરમાં ઈન્ડિઝનો વિજય!

વિન્ડીઝ ક્રિકેટ ટીમે ICC T20 વર્લ્ડ કપ 2021માં બાંગ્લાદેશને હરાવીને તેની પ્રથમ જીત નોંધાવી છે. વિન્ડીઝે 143 રનનો ટાર્ગેટ આપ્યો હતો, પરંતુ બાંગ્લાદેશ છેલ્લી ઓવરમાં 13 રન બનાવી ન શકતા વેસ્ટ ઈન્ડિઝ 3 રને જીતી ગયું હતું.

શારજાહ : વિન્ડીઝ ક્રિકેટ ટીમે ICC T20 વર્લ્ડ કપ 2021માં બાંગ્લાદેશને હરાવીને તેની પ્રથમ જીત નોંધાવી છે. વિન્ડીઝે 143 રનનો ટાર્ગેટ આપ્યો હતો, પરંતુ બાંગ્લાદેશ છેલ્લી ઓવરમાં 13 રન બનાવી ન શકતા વેસ્ટ ઈન્ડિઝ 3 રને જીતી ગયું હતું. બાંગ્લાદેશની આ ત્રીજી હાર છે. આ સાથે જ તે સેમીફાઈનલની રેસમાંથી બહાર થઈ ગઈ છે અને વિન્ડીઝની આશા હજુ જીવંત છે. બાંગ્લાદેશ તરફથી લિટન દાસે 43 બોલમાં 44 રન બનાવ્યા હતા. બીજી તરફ કેપ્ટન મહમુદુલ્લાહે 24 બોલમાં અણનમ 31 રન બનાવ્યા જેમાં 2 ચોગ્ગા અને 1 છગ્ગાનો સમાવેશ થાય છે. જો કે તે ટીમને જીત તરફ લઈ જઈ શક્યો ન હતો. વિન્ડીઝ તરફથી રવિ રામપોલ, જેસન હોલ્ડર, આન્દ્રે રસેલ, અકીલ હુસૈન અને ડ્વેન બ્રાવોએ 1-1 વિકેટ લીધી હતી.

આ પહેલા બાંગ્લાદેશે ટોસ જીતીને બોલિંગ કરવાનો નિર્ણય લીધો હતો. વિન્ડીઝે 7 વિકેટ ગુમાવી 142 રન બનાવ્યા હતા. નિકોલસ પૂરણે 22 બોલમાં 1 ફોર અને 4 સિક્સર સાથે 40 રન બનાવ્યા હતા. વિન્ડીઝ ટીમ માટે ક્રિસ ગેલ અને એવિન લુઈસ ઓપનિંગ કરવા આવ્યા હતા. ગેઈલ 10 બોલમાં માત્ર 4 રન બનાવી શક્યો હતો, જ્યારે લુઈસે 6 રન બનાવ્યા બાદ પોતાની વિકેટ ગુમાવી હતી. ટીમના 18ના સ્કોર પર બંને ઓપનર પેવેલિયન પરત ફર્યા હતા. ત્યારબાદ ત્રીજા નંબરે રોસ્ટન ચેઝે ઇનિંગ્સને સંભાળવાનો પ્રયાસ કર્યો, પરંતુ બીજા છેડેથી વિકેટો પડતી રહી. રોસ્ટને શિમરોન હેટમાયર સાથે મળીને ટીમનો સ્કોર 32 સુધી પહોંચાડ્યો હતો. પરંતુ હેટમાયર 7મી ઓવરમાં 9 રન બનાવીને પેવેલિયન પરત ફર્યો હતો.

ત્યારબાદ કિરોન પોલાર્ડ ક્રિઝ પર આવ્યો હતો. જો કે, તે 16 બોલ રમીને રિટાયર્ડ હર્ટ થયો હતો. ત્યારબાદ આન્દ્રે રસેલ આવ્યો, જે બોલ રમ્યા વિના ડાયમંડ ડક પર આઉટ થયો હતો. 12.4 ઓવરમાં વિન્ડીઝને આ ચોથો ઝટકો લાગ્યો હતો. ત્યારબાદ નિકોલસ પૂરન આવ્યો, જેને ઝડપી રન કરવાનો પ્રયાસ કર્યો હતો, પરંતુ 19મી ઓવરમાં ઇસ્લામે પ્રથમ બે બોલમાં બે વિકેટ ઝડપીને વધતા સ્કોર પર બ્રેક લગાવી દીધી હતી. રોસ્ટન 39 રન બનાવીને આઉટ થયો હતો. ત્યારબાદ ડ્વેન બ્રાવો પણ છેલ્લી ઓવરના પહેલા બોલ પર 1 રન બનાવીને આઉટ થયો હતો. ત્યારબાદ પોલાર્ડ ક્રિઝ પર આવ્યો હતો. તેણે છેલ્લા બોલ પર સિક્સ ફટકારીને સ્કોર 142 સુધી પહોંચાડ્યો હતો. જેસન હોલ્ડરે 5 બોલમાં અણનમ 15 રન બનાવ્યા હતા. પોલાર્ડ 14 રન બનાવીને અણનમ રહ્યો હતો. બાંગ્લાદેશ તરફથી બોલિંગમાં મહેંદી હસન, મુસ્તફિઝુર રહેમાન અને શોરીફુલ ઈસ્લામે 2-2 વિકેટ લીધી હતી.

ટાર્ગેટનો પીછો કરતા બાંગ્લાદેશે ઇનિંગ્સની શરૂઆત મોહમ્મદ નઈમ અને શાકિબ અલ હસન સાથે કરી હતી, પરંતુ તેની ભાગીદારી 21 રનમાં તૂટી ગઈ હતી. શાકિબ 9 રન બનાવી શક્યો હતો. ત્યારબાદ નઈમ પણ 17 રન બનાવીને આઉટ થયો હતો. આ પછી લિટન દાસ અને સૌમ્યા સરકારે ઇનિંગ્સને સંભાળવાનો પ્રયાસ કર્યો હતો. બંનેએ ટીમનો સ્કોર 60 સુધી પહોંચાડ્યો હતો. પરંતુ 11મી ઓવરમાં સૌમ્ય 17 રન બનાવીને આઉટ થયો હતો. ત્યારબાદ મુશ્ફિકુર રહીમ પણ 8 રન બનાવીને આઉટ થયો હતો. લિટન દાસે 44 રન બનાવ્યા હતા. બાંગ્લાદેશને ઈનિંગના છેલ્લા બોલે જીતવા માટે 4 રનની જરૂર હતી, પરંતુ મહમુદુલ્લાહ બોલને ફટકારી શક્યો નહોતો.

English summary

T20 WC: Bangladesh out of semifinal race, Indies win in last over!