દેસી સ્થળ, વિદેશી મહેમાનઃ પંખીના કલરવથી ખીલી ઉઠે છે આસમાન

Published: Monday, November 25, 2013, 12:46 [IST]

ડભોઇ તાલુકાના વઢવાણા ગામે 100 વર્ષ પહેલા ગાયકવાડી શાસનમાં એક વિશાળ સરોવર બનાવવામાં આવ્યું હતુ. વરસાદી પાણી ઉપરાંત અન્ય કેનાલોમાંથી પાણી મેળવીને તેનો ઉપયોગ પશુ-પક્ષીઓ અને તાલુકાના આજુબાજુના 22 જેટલા ગામોના ખેડૂતોને ખેતીકામમાં પાણીનો ઉપયોગ થાય તે હેતુસર વઢવાણા સિંચાઇ તળાવ બનાવવામાં આવ્યું છે. જેનો વહિવટ હાલ વડોદરા જિલ્લા સિંચાઇ વિભાગ અને વન વિભાગ ગુજરાત રાજ્ય દ્વારા કરવામાં આવી રહ્યો છે.

આ સ્થળનો એક પ્રવાસન સ્થળ તરીકે વિકાસ થાય અને દૂર-દૂરથી પ્રવાસીઓ અહીં આવીને આ અજોડ પ્રવાસન સ્થળની યાદો પોતાની સાથે સમેટીને જાય તેવા પ્રયાસો વન વિભાગ દ્વારા કરવામાં આવી રહ્યાં છે. શિયાળુ ઋતુનો પ્રારંભ થતાં જ આ વિશાળ સરોવર સિંચાઇ તળાવમાં હજારો કિમી દૂરથી પક્ષીના ઝૂંડ ઉતરી પડતા હોય છે. આ તળાવની આસપાસ સંખ્યાબંધ વૃક્ષો તેમજ પક્ષીઓને અનરૂપ આબોહવા તથા પૂરતા પ્રમાણમાં પાણી મળી રહેતા પક્ષીઓને વિહરવા માટે આ સ્થળ એક દમ યોગ્ય સાબિત થઇ રહ્યું છે. જેના કારણે અહીં આવતા પ્રવાસી પક્ષીઓના આનંદ કિલ્લોલની મજા મણવામાં સફળ નીવડે છે.

આ તળાવે ચીન, મલેસિયા, જાપાન, દુબઇ, રશિયા, આફ્રિકા, આયર્લેન્ડ સહિતના વિવિધ દેશોના જાત જાતના અને ભાત ભાતના પક્ષીઓ જોવા મળે છે. જેમાં સુરખાબ, ગાજ હંસ, રાજ હંસ, ગ્યાનો, પીયાસન, ગડવાણ અને હાબરી કારસીય મુખ્ય છે. આ ભાત-ભાતના પક્ષીઓને જોવા માટે વઢવાણા તળાવ ખાતે મોટી સંખ્યામાં રવિવારે પ્રવાસીઓનો જમાવડો જોવા મળે છે. તો ચાલો તસવીરો થકી નીહાળીએ આ સોહામણા સ્થળ અને તેના વિદેસી મહેમાનોને.