ખેતી સમાચાર : 21 ઓક્ટોબરથી ખરીફ પાકોની ટેકાના ભાવે ખરીદી શરૂ થશે, આવી રીતે કરો નોંધણી

Published: Sunday, September 24, 2023, 19:23 [IST]

વિવિધ ખરીફ પાકો માટે દર વર્ષે સરકાર ટેકાના ભાવ જાહેર કરે છે અને તે ભાવે ખરીદી કરે છે. આ વર્ષે પણ સરકાર ટેકાના ભાવે ખરીદી શરૂ કરવા જઈ રહી છે. આ માટે 25 સપ્ટેમ્બરથી રજીસ્ટ્રેશન કરાવી શકશે.

કૃષિ મંત્રી રાઘવજી પટેલના અધ્યક્ષ સ્થાને મગફળી, મગ, અડદ અને સોયાબીન જેવા ખરીફ પાકોની ટેકાના ભાવે ખરીદી કરવાના આયોજન અંગે ઉચ્ચસ્તરીય બેઠક યોજાઇ હતી.

આ મુદ્દે વાત કરતા કૃષિ મંત્રી રાધવજી પટેલે જણાવ્યુ કે, રાજ્યના ખેડૂતોને તેમની ઉપજના પોષણક્ષમ ભાવ સાથે આર્થિક રક્ષણ પણ મળી રહે તે માટે રાજ્ય સરકાર દ્વારા ખરીફ પાકોની ટેકાના ભાવે ખરીદી કરવાનું આયોજન કરવામાં આવ્યું છે.

આ બેઠકમાં ટેકાના ભાવે ખરીદી અંગે કરાયેલા આયોજનની માહિતી આપતા જણાવ્યુ કે, ભારત સરકારના પ્રધાનમંત્રી અન્નદાતા આય સંરક્ષણ અભિયાન અંતર્ગત પી.એસ.એસ. હેઠળ ગુજરાતમાં મગફળી, મગ, અડદ અને સોયાબીન પાકની ટેકાના ભાવે આગામી 21 ઑક્ટોબરથી ખરીદી શરૂ કરવા માટેનો મહત્વપૂર્ણ નિર્ણય કરવામાં આવ્યો છે.

તેમણે કહ્યું કે, કુલ વાવેતર વિસ્તાર અને ઉત્પાદનને ધ્યાને રાખીને રાજ્યમાં મગફળી માટે 160, મગ માટે 73, અડદ માટે 105 અને સોયાબીન માટે 97 ખરીદ કેન્દ્રો નક્કી કરવામાં આવ્યા છે. આ કેન્દ્રો પરથી ટેકાના ભાવે ખરીદી કરવામાં આવશે.

તેમણે કહ્યું કે, ચાલુ સીઝનમાં ખેડૂતો પાસેથી ૬૩૬૪.૨૪ કરોડ મૂલ્યની ૯.૯૮ લાખ મેટ્રિક ટન મગફળી અને ૪૨૦ કરોડ મૂલ્યના ૯૧,૩૪૩ મેટ્રિક ટન સોયાબીનની ખરીદી કરવાનું આયોજન છે.

ખેડૂતોને ટેકાના ભાવે ખરીફ પાકોનું વેચાણ કરવા અનુરોધ કરતા તેમણે કહ્યું કે, ખરીફ પાકોની ટેકાના ભાવે ખરીદી કરવા માટે રાજ્યના તમામ જિલ્લાના ખેડૂતોએ ૨૫ સપ્ટેમ્બરથી ૧૬ ઑક્ટોબર દરમિયાન ઈ-ગ્રામ કેન્દ્રો ખાતેથી VCE મારફત ઈ-સમૃધ્ધિ પોર્ટલ પર ઓનલાઇન નોંધણી કરાવવાની રહેશે.

રાજ્ય સરકાર દ્વારા મગફળી, મગ, અડદ અને સોયાબીનની ખેડૂતો પાસેથી પૂરતા પ્રમાણમાં ખરીદી કરવામાં આવશે, અને આ માટે રાજ્ય સરકાર દ્વારા પૂરતું આગોતરૂ આયોજન કરવામાં આવ્યું છે.

અહીં તમને એ પણ જણાવી દઈએ કે, ભારત સરકાર દ્વારા ચાલુ વર્ષ ૨૦૨૩-૨૪ માટે ખરીફ પાકોનું વાવેતર થાય તે અગાઉ જ ટેકાના ભાવ જાહેર કરવામાં આવ્યા હતા. જે અનુસાર મગફળીનો ટેકાનો ભાવ ૬૩૭૭ પ્રતિ ક્વિન્ટલ, મગનો ટેકાનો ભાવ ૮૫૫૮ પ્રતિ ક્વિન્ટલ, અડદનો ટેકનો ભાવ ૬૯૫૦ પ્રતિ ક્વિન્ટલ અને સોયાબીનનો ટેકનો ભાવ ૪૬૦૦ પ્રતિ ક્વિન્ટલ જાહેર કરવામાં આવ્યો છે.

Published On September 24, 2023