ગુજરાતમાં આજથી ચણા-રાયડાની ટેકાના ભાવે ખરીદી શરૂ, 2.96 લાખ ખેડૂતોને ફાયદો થશે
ગુજરાતના લાખો જગતના તાત માટે આજનો દિવસ ખુશીના સમાચાર લઈને આવ્યો છે. રાજ્ય સરકાર દ્વારા આજથી સમગ્ર રાજ્યમાં ચણા અને રાયડાની ટેકાના ભાવે ખરીદી પ્રક્રિયાનો વિધિવત પ્રારંભ કરી દેવામાં આવ્યો છે.
મુખ્યમંત્રીના માર્ગદર્શન હેઠળ કૃષિ વિભાગ દ્વારા આ ખરીદી માટે તમામ આગોતરી તૈયારીઓ પૂર્ણ કરી લેવાઈ છે. ખેડૂતોને તેમના પાકનું પૂરતું વળતર મળે તે હેતુથી આ મહત્વનો નિર્ણય લેવામાં આવ્યો છે.
આ વર્ષે રાજ્યમાં ચણાના વેચાણ માટે 2.59 લાખથી વધુ ખેડૂતોએ નોંધણી કરાવી છે. જ્યારે રાયડાના પાક માટે 37 હજારથી વધુ ખેડૂતોએ સરકારી પોર્ટલ પર સફળતાપૂર્વક રજિસ્ટ્રેશન કરાવ્યું છે.
રાજ્યભરના કુલ 2.96 લાખથી વધુ ખેડૂતોને આ સરકારી ખરીદીનો સીધો લાભ મળવાનો છે. આ આર્થિક સહાય ખેડૂતોને સમૃદ્ધ બનાવવા અને ખેતી ખર્ચમાં રાહત આપવા માટે લેવાયેલું મોટું પગલું છે.
ખેડૂતોની સુવિધા માટે રાજ્ય સરકારે મજબૂત માળખું તૈયાર કર્યું છે. જે અંતર્ગત ચણાની ખરીદી માટે 165 કેન્દ્રો અને રાયડા માટે 60 જેટલા વિવિધ કેન્દ્રો કાર્યરત કરવામાં આવ્યા છે.
કૃષિ મંત્રીએ ખાતરી આપી છે કે નોંધણી કરાવનાર દરેક ખેડૂત પાસેથી પાકની ખરીદી કરાશે. કોઈ પણ ખેડૂત આ પ્રક્રિયામાંથી બાકાત ન રહી જાય તેની ખાસ તકેદારી રાખવામાં આવી છે.
ખરીદી પ્રક્રિયામાં પારદર્શિતા લાવવા માટે આ વખતે ટેકનોલોજીનો મહત્તમ ઉપયોગ થયો છે. ગેરરીતિ રોકવા માટે પહેલીવાર બાયોમેટ્રિક અને ફેસ ઓથેન્ટિકેશન જેવી અદ્યતન પદ્ધતિઓ અમલમાં મૂકાઈ છે.
જે ખેડૂતો બીમારી કે અન્ય કારણોસર કેન્દ્ર પર રૂબરૂ હાજર રહી શકે તેમ નથી, તેમના માટે રાહત અપાઈ છે. આવા કિસ્સામાં ખેડૂતો તેમના અધિકૃત નોમિની દ્વારા પણ પાકનું વેચાણ કરી શકશે.
ખેડૂતોને કેન્દ્રો પર લાંબી લાઈનોમાં ઊભા ન રહેવું પડે તે માટે SMS સિસ્ટમ ગોઠવવામાં આવી છે. દરેક ખેડૂતને તેમના મોબાઈલ પર મેસેજ મોકલીને ચોક્કસ સમય અને તારીખની જાણ કરાશે.
તંત્ર દ્વારા ખેડૂતોને વિનંતી કરાઈ છે કે તેઓ તેમને મળેલા મેસેજ મુજબ જ કેન્દ્ર પર પહોંચે. આ વ્યવસ્થાથી ખેડૂતોનો કિંમતી સમય બચશે અને ખરીદી પ્રક્રિયા પણ ખૂબ જ સરળ બનશે.
Click it and Unblock the Notifications
Sign in with Google
