Kharif pak : ગુજરાતમાં ખરીફ પાકોનું 96 ટકા વાવેતર પુર્ણ થયુ, મગફળી અને કપાસ સૌથી આગળ

Kharif pak : ગુજરાતમાં ચોમાસુ પૂરું થવા આવ્યું છે અને આ વર્ષે સારો વરસાદ થવાથી રાજ્યમાં ખેતીની કામગીરી જોરશોરથી ચાલી રહી છે.

કૃષિ વિભાગના આંકડા અનુસાર, ગુજરાતમાં અત્યાર સુધીમાં 96.29 ટકા ખરીફ પાકનું વાવેતર પૂર્ણ થઈ ચૂક્યું છે.

સૌથી વધુ વાવેતર થયેલા પાકોમાં મગફળી અને કપાસ મોખરે છે. 22 લાખ હેક્ટરથી વધુ જમીનમાં મગફળીનું વાવેતર થયું છે, જ્યારે 20 લાખ હેક્ટરમાં કપાસનું વાવેતર થયું છે. આ સિવાય, ડાંગરનું વાવેતર પણ 8 લાખ હેક્ટરથી વધુ જમીનમાં થયું છે.

રાજ્યમાં હાલ સુધીમાં સરેરાશ 92.64% વરસાદ પડ્યો છે, જે ખેતી માટે ખૂબ જ ફાયદાકારક છે. રાજ્યના સ્ટેટ ઇમરજન્સી ઓપરેશન સેન્ટર (SEOC) મુજબ સૌથી વધુ વરસાદ ઉત્તર ગુજરાતમાં (96.94%) અને દક્ષિણ ગુજરાતમાં (96.91%) નોંધાયો છે.

રાજ્યના કુલ 206 ડેમમાંથી 113 ડેમને હાઈ એલર્ટ પર મૂકવામાં આવ્યા છે. જેમાં 82 ડેમ સંપૂર્ણપણે ભરાઈ ગયા છે, 68 ડેમ 70-100% ભરાયા છે, અને 24 ડેમ 50-70% ભરાયા છે. ગુજરાતની જીવાદોરી સમાન સરદાર સરોવર ડેમ પણ 89% થી વધુ ભરાઈ ગયો છે.

છેલ્લા 24 કલાકમાં રાજ્યના 24 જિલ્લાના 158 તાલુકાઓમાં 12 મિલીમીટરથી વધુ વરસાદ પડ્યો છે. આગામી આગાહીઓને ધ્યાનમાં રાખીને હવામાન વિભાગે 4 થી 7 સપ્ટેમ્બર દરમિયાન માછીમારોને દરિયો ન ખેડવાની સલાહ આપી છે.

English summary

Gujarat Kharif Sowing Reaches 96%, Groundnut & Cotton Lead The Way