Gujarat Rain : ગુજરાતના 76 ડેમ હાઈએલર્ટ પર, સરદાર સરોવર ડેમ ૭૬.૪૦ ટકા ભરાયો

Gujarat Rain : ચાલુ ચોમાસાની સિઝનમાં ગુજરાત પર મેઘરાજા મન મૂકીને વરસ્યા છે. સાર્વત્રિક વરસાદના કારણે રાજ્યના જળસ્ત્રોતોમાં મોટા પ્રમાણમાં વધારો થયો છે, જેનાથી રાજ્યના ખેડૂતો અને નાગરિકોમાં ખુશીની લાગણી જોવા મળી રહી છે.

૧૮ ઓગસ્ટ ૨૦૨૫ની સ્થિતિ અનુસાર, રાજ્યના કુલ ૨૦૭ ડેમમાંથી ૭૬ ડેમ ૭૦ થી ૧૦૦ ટકા સુધી ભરાઈ ગયા છે, જેમને હાઈએલર્ટ પર મૂકવામાં આવ્યા છે.

રાજ્યના જળ સંસાધન વિભાગના આંકડા મુજબ, ૨૬ ડેમ એલર્ટ અને ૨૨ ડેમ વોર્નિંગ પર છે. ગુજરાતની જીવાદોરી ગણાતા સરદાર સરોવર ડેમમાં પણ તેની કુલ ક્ષમતાના ૭૬.૪૦ ટકા જેટલો જળસંગ્રહ થયો છે.

ગુજરાતમાં અત્યાર સુધીમાં સરેરાશ ૬૮.૯૧ ટકા વરસાદ નોંધાયો છે.

• દક્ષિણ ગુજરાત : ૭૨ ટકા
• ઉત્તર ગુજરાત : ૭૧ ટકા
• કચ્છ : ૭૦ ટકા
• પૂર્વ મધ્ય ગુજરાત : ૬૯ ટકા
• સૌરાષ્ટ્ર : ૬૩ ટકા

છેલ્લા ૨૪ કલાકમાં પણ રાજ્યના વિવિધ વિસ્તારોમાં સારો એવો વરસાદ નોંધાયો છે. રાજકોટના ધોરાજીમાં ૩ ઇંચથી વધુ, માળિયાહાટીના અને ડાંગના આહવામાં ૨ ઇંચથી વધુ વરસાદ પડ્યો છે.

આ ઉપરાંત અબડાસા, કામરેજ અને સુબીર તાલુકામાં પણ ૨ ઇંચથી વધુ વરસાદ થયો છે. રાજ્યના કુલ ૨૪ તાલુકામાં એક ઇંચથી વધુ વરસાદ નોંધાયો હોવાનું સ્ટેટ ઇમરજન્સી ઓપરેશન સેન્ટર (SEOC) દ્વારા જણાવાયું છે.

સારી વર્ષાને કારણે ખેડૂતોમાં ઉત્સાહનો માહોલ છે. કૃષિ વિભાગના અહેવાલ મુજબ, અત્યાર સુધીમાં રાજ્યમાં કુલ ૮૭ ટકાથી વધુ વિસ્તારમાં ખરીફ પાકનું વાવેતર થઈ ચૂક્યું છે.

• મગફળી : ૨૦ લાખ હેક્ટર
• સોયાબીન : ૨.૭૩ લાખ હેક્ટર
• ડાંગર : ૮.૪૩ લાખ હેક્ટર

આ વાવેતરથી સ્પષ્ટ થાય છે કે આ વર્ષે કૃષિ ક્ષેત્રમાં સારો પાક ઉતરી શકે છે, જેનાથી ખેડૂતોની આર્થિક સ્થિતિમાં સુધારો થશે.

હવામાન વિભાગ (IMD) દ્વારા ૧૮ થી ૨૧ ઓગસ્ટ દરમિયાન માછીમારોને દરિયો ન ખેડવાની સલાહ આપવામાં આવી છે. રાજ્યના દરિયાકિનારાના વિસ્તારોમાં વરસાદ અને તોફાની પવનની શક્યતાને ધ્યાનમાં રાખીને આ ચેતવણી જારી કરવામાં આવી છે.

English summary

Gujarat Rain: 76 Dams on High Alert, Sardar Sarovar Dam Fills to 76.40%