Gold Rate: OPECના એલાનથી સોનાના ભાવ ગગડ્યા, હવે ખરીદવુ કે વેચવુ?

સોનાના ભાવ ગયા અઠવાડિયે રેકોર્ડબ્રેક ઉંચી સપાટીએ પહોંચી ગયા હતા પરંતુ રવિવારે ઓપેક પ્લસ દેશોએ આશ્ચર્યજનક રીતે તેલ ઉત્પાદનમાં કાપની જાહેરાત કરી હતી. જે બાદ સોનામાં વેચવાલી જોવા મળી હતી. જેના કારણે સોનાના ભાવમાં ઘટાડો થયો છે.

મલ્ટી કૉમોડિટી એક્સચેન્જ (MCX) પર એપ્રિલ 2023 માટે ગોલ્ડ ફ્યુચર્સ કૉન્ટ્રાક્ટ સોમવારે ઓછો ખુલ્યો હતો અને સ્થાનિક બજારમાં રૂ. 59060 પ્રતિ 10 ગ્રામ જેટલો નીચો ગયો હતો. બીજી તરફ, આંતરરાષ્ટ્રીય બજારમાં સોનાની કિંમત 0.90 ટકા ઘટીને 1950 ડોલર પ્રતિ ઔંસના સ્તરે પહોંચી ગઈ છે.

બીજી તરફ ચાંદીના ભાવમાં પણ ઘટાડો જોવા મળ્યો હતો. મે 2023 માટે MCX સિલ્વર ફ્યુચર્સ કૉન્ટ્રાક્ટ રૂ. 71,811 પ્રતિ કિલોના ભાવે ખૂલ્યો હતો અને બજાર ખૂલવાની મિનિટોમાં રૂ. 71,437ની નીચી સપાટીએ પહોંચ્યો હતો. વળી, આંતરરાષ્ટ્રીય બજારમાં, ચાંદીની કિંમત 2 ટકાથી વધુ ઘટીને 23.58 ડૉલર પ્રતિ ઔંસ થઈ ગઈ છે.

નિષ્ણાતોના મતે સોનુ સારુ પ્રદર્શન કરી રહ્યુ છે. આ સ્થિતિમાં, ઘટાડા છતાં તે લોકોને સોનુ ખરીદવાની સલાહ આપી રહ્યા છે. તેઓ માને છે કે OPEC+ દેશો દ્વારા તેલ ઉત્પાદનમાં કાપની આશ્ચર્યજનક જાહેરાતથી ફુગાવા અંગે ચિંતા વધી છે અને સોનાના ભાવને ટેકો આપશે. નિષ્ણાતો માને છે કે વધતી જતી મોંઘવારીની ચિંતાઓને કારણે, જો ક્રૂડ ઓઈલના ભાવ બેરલ દીઠ 80થી 90 ડૉલરની રેન્જમાં જળવાઈ રહે તો આર્થિક મંદીની અટકળોને વેગ મળી શકે છે. એ સમયમાં સોનુ જ લોકોને બચાવશે.

IIFL સિક્યોરિટીઝના અનુજ ગુપ્તાએ સોના અને ચાંદીના રોકાણકારોને ડિપ્સ પર ખરીદીની વ્યૂહરચના જાળવી રાખવાની સલાહ આપી હતી. તેમણે કહ્યું કે પરિસ્થિતિઓ સોના અને ચાંદીની તરફેણમાં છે. ટૂંક સમયમાં તેમની કિંમતોમાં ઉછાળો આવશે.

English summary

Gold and silver new price after announcement of OPEC Plus countries