30 સપ્ટેમ્બર સુધીમાં પેટ્રોલના ભાવ ઘટી શકે

Published: Friday, September 27, 2013, 18:17 [IST]

નવી દિલ્હી, 27 સપ્ટેમ્બર : આવનારા દિવસોમાં વાહન ચાલકોને થોડી રાહત થઇ શકે છે. આ રાહત પેટ્રોલની કિંમતોમાં ઘટાડાના રૂપે મળી શકે છે. પેટ્રોલિયમ અને પ્રાકૃતિક ગેસ મંત્રી વીરપ્પા મોઇલીએ શુક્રવારે સંકેત આપ્યા હતા. જો આમ થશે તો પાછલા પાંચ મહિનામાં પહેલીવાર પેટ્રોલની કિંમતોમાં ઘટાડો થશે.

પેટ્રોલના ભાવમાં આ ઘટાડો ચાલુ મહિનાના અંત સુધીમાં થઇ શકે છે. પેટ્રોલિયમ કંપનીઓનું કહેવું છે કે પેટ્રોલના ભાવમાં રૂપિયા 1થી રૂપિયા 1.50 સુધીનો ઘટાડો થઇ શકે છે. ઓઇલ કંપનીઓ આ મહિનાના અંતમાં પેટ્રોલના ભાવની સમીક્ષા કરશે. ડોલરની સરખામણીએ રૂપિયો મજબૂત બનતા આ ઘટાડો શક્ય બનશે.

આજે મોઇલીએ જણાવ્યું કે વર્તમાનમાં આ ગતિશીલ મૂલ્ય પદ્ધતિ છે. જેના કારણે કિંમતો સ્થિર નથી. આંતરરાષ્ટ્રીય માર્કેટમાં તેલની કિંમતોમાં ઘટાડો થાય કે ડોલરની સામે રૂપિયો મજબૂત બને તો તેનો લાભ વપરાશકારોને ઉપલબ્ધ કરાવવામાં આવશે.

ઉલ્લેખનીય છે કે મે 2013માં પેટ્રોલની કિંમતોમાં પ્રતિ લીટર રૂપિયા ત્રણનો ઘટાડો કરવામાં આવ્યો હતો. ત્યાર બાદ પેટ્રોલની કિંમતોમાં સાત વાર વધારો થઇ ચૂક્યો છે. આ સાત વધારા દરમિયાન પેટ્રોલની કિંમતોમાં કુલ 10.80 રૂપિયાનો વધારો થઇ ચૂક્યો છે. આ કિંમતમાં વેટનો સમાવેશ થયો નથી. છેલ્લે 14 સપ્ટેમ્બર 2013ના રોજ પેટ્રોલની કિંમતોમાં પ્રતિ લીટર રૂપિયા 1.63નો વધારો કરવામાં આવ્યો હતો.

Published On September 27, 2013