એક્ઝિટ પોલમાં ભાજપની જીતના એંધાણથી શેરબજારમાં ઉછાળો

નવી દિલ્હી, 5 ડિસેમ્બર: ગઇકાલે બુધવારે દિલ્હીમાં 70 બેઠકોની દિલ્હી વિધાનસભાની ચૂંટણી સમાપ્ત થયા બાદ દેશના પાંચે પાંચ રાજ્યોની ચૂંટણીના પડઘમ શાંત થયા અને સાથે સાથે એક્ઝિટ પોલનો ઢોલ વાગવા લાગ્યો. મતદાન સમાપ્ત થયાના કાલાકોમાં જ વિવિધ મીડિયા ગ્રુપના એક પછી એક એક્ઝિટ પોલ આવવા લાગ્યા, આ એક્ઝિટ પોલ અનુસાર મધ્ય પ્રદેશ, દિલ્હી, રાજસ્થાન અને છત્તીસગઢમાં ભારતીય જનતા પાર્ટીની સરકાર બને છે એવા અનુમાનો આવ્યા. આ અનુમાનને પગલે આજે ભારતીય શેરબજારમાં ભારે ઉછાળો જોવા મળ્યો છે.

દેશની રાજ્ય વિધાનસભાઓની ચૂંટણીમાં ભાજપ દ્વારા કરવામાં આવેલા સારા પ્રદર્શનના અનુમાનના પગલે શેરોની ભારે ખરીદદારી થઇ અને બોમ્બે સ્ટોક એક્સચેન્જનો સૂચકાંક આજે શરૂઆતી કારોબારમાં 439 પોઇન્ટ વધીને 21,000ના મનોવૈજ્ઞાનિક સ્તરને પાર કરી ગયો.

શેરબજારના સૂચકાંકમાં બે સત્રોમાં 189.30 પોઇન્ટની પડતી નોંધવામાં આવી હતી. આજે કારોબારમાં સેન્સેક્સ 439.55 પોઇન્ટ અથવા 2.12 ટકાનો ઉછાળા સાથે 21,000ના સ્તરને પાર કરી 21,148.26 પર પહોંચી ગયો. જ્યારે નેશનલ સ્ટોક એક્સચેન્જનો સૂચકાંક નિફ્ટી પણ 121.90 પોઇન્ટ વધીને 6,282.85 પર આવી ગયું.

English summary

The Sensex and the Nifty surged in trade as most of the opinion polls showed a strong BJP showing in state elections, raising the prospects of a BJP led government at the Centre in next year's general elections.