Fact Check: મણિપુરના વાયરલ વીડિયોમાં આરોપી છે ભાજપનો નેતા? જાણો શું છે સચ્ચાઇ

Published: Tuesday, July 25, 2023, 9:26 [IST]

મણિપુરમાં ચાલી રહેલી હિંસા વચ્ચે તાજેતરમાં જ એક શરમજનક વીડિયો સામે આવ્યો હતો, જેમાં કેટલાક લોકોના ટોળા દ્વારા એક ગામમાં બે મહિલાઓને નગ્ન કરીને પરેડ કરવામાં આવી હતી. આ વીડિયો વાયરલ થયા બાદ સમગ્ર દેશમાં ગુસ્સો ફેલાઈ ગયો હતો. આ દરમિયાન એક ફોટો શેર કરવામાં આવ્યો છે, જેમાં દાવો કરવામાં આવ્યો છે કે આ ફોટો મણિપુર વીડિયોના આરોપીનો છે.

રાષ્ટ્રીય સ્વયંસેવક સંઘ (RSS)નો ગણવેશ પહેરેલા બે લોકોનો એક ફોટોગ્રાફ સોશિયલ મીડિયા પર વાયરલ થઈ રહ્યો છે, જેમાં એક યુઝરે દાવો કર્યો છે કે તેઓ મણિપુર વાયરલ વીડિયો કેસમાં આરોપી છે.

હકીકતમાં, તાજેતરમાં એક વીડિયો વાયરલ થયો હતો, જેમાં મેઇતેઈ સમુદાયના પુરુષોના ટોળાએ મણિપુરમાં કુકી સમુદાયની નગ્ન મહિલાઓની કથિત રીતે પરેડ કરી હતી.

કમ્યુનિસ્ટ પાર્ટી ઓફ ઈન્ડિયા (માર્કસવાદી)ના પોલિટબ્યુરો સભ્ય સુભાસિની અલી સહિત ઘણા લોકોએ ટ્વિટર હેન્ડલ્સ પર આ તસવીર શેર કરી છે. સુભાસિની અલીએ ફોટો સાથે કેપ્શનમાં લખ્યું- તે મણિપુરનો આરોપી છે. તેમના કપડાં દ્વારા તેમને ઓળખો.

આ ટ્વીટને એક મિલિયનથી વધુ વખત જોવામાં આવ્યું છે. જો કે, જ્યારે આ તસવીરની તપાસ કરવામાં આવી તો સત્ય કંઈક બીજું જ બહાર આવ્યું. વાયરલ દાવો સંપૂર્ણપણે ખોટો છે. તસવીરમાં ભારતીય જનતા પાર્ટી (BJP)ના ઉપાધ્યક્ષ ચિદાનંદ સિંહ અને તેમનો પુત્ર દેખાય છે.

This is incorrect. Sincere apologies https://t.co/YRFaOVX4mU
— Subhashini Ali (@SubhashiniAli) July 23, 2023

બીજી તરફ ચિદાનંદ સિંહે તેમના સોશિયલ મીડિયા એકાઉન્ટ પર દાવો શેર કરનારાઓ વિરુદ્ધ ફરિયાદ નોંધાવી છે. જો કે અલીએ ખોટા દાવાને શેર કરવા બદલ માફી માંગી છે, પરંતુ ટ્વીટ ડિલીટ કરવામાં આવ્યુ નથી.

તમને જણાવી દઈએ કે આ તસવીર 17 ઓક્ટોબર 2022ના રોજ બીજેપી મણિપુરના ઉપાધ્યક્ષ ચિદાનંદ સિંહ દ્વારા અપલોડ કરવામાં આવી હતી, જેને હવે આ ઘટના સાથે જોડવામાં આવી રહી છે. નોંધનીય છે કે મણિપુરમાં મહિલાઓ સાથે ઘૃણાસ્પદ કૃત્યો કરવા બદલ અત્યાર સુધીમાં એક કિશોર સહિત છ લોકોની ધરપકડ કરવામાં આવી છે અને તસવીરમાં દેખાતા લોકો તેમની વચ્ચે નથી.