સ્વતંત્રતા દિવસ: નીચેમાંથી તમારી દેશભક્તિ કંઇ ટાઇપની છે?

સ્વતંત્રતા દિવસ પર જાણો તમે કેવી ટાઇપની દેશભક્તિ ધરાવો છો?

Updated: Sunday, August 13, 2017, 19:21 [IST]

15 ઓગસ્ટે આપણા દેશની આઝાદીને 70 વર્ષ પૂરા થશે. આપણે છેલ્લા 70 વર્ષોથી આઝાદ છીએ પણ જો તમને વૈચારિક સ્વાતંત્રતાથી કંઇક "ખાસ" વાંધો ના હોય તો એક સવાલ પૂછવા માંગુ છું કે, તમારી દેશભક્તિ કઇ ટાઇપની છે? ફોન ટાઇપની, સોશ્યલ મીડિયા ટાઇપની, રજા ટાઇપની કે ઉપરોક્ત કોઇ પણ ટાઇપની નહીં.

કે પછી તમે કદી આવા પ્રશ્ન પર ધ્યાન જ નથી આપ્યું. કારણ કે દેશ ભક્તિ તો દેશ ભક્તિ હોય... તેમાં ટાઇપ થોડીના હોય? બિલકુલ સાચી વાત. પણ આજની દુનિયામાં એવું છે નહીં. જુઓ આ આખી વાતમાં પરમ સત્ય એ જ છે કે દેશભક્તિ એક અદ્ઘભૂત ભાવના છે. અને તે વાતનું પુરતું સન્માન કરતા કંઇક પૂછવા માંગુ છું... લાગે તો આ વાતે વિચારજો ના લાગે તો બીજી 15મી ઓગસ્ટ સુધી ભૂલી જજો.

તમારા મતે સ્વતંત્રતા દિવસ એટલે શું?

સામાન્ય લોકો એટલે કે મારા-તમારા જેવા લોકોના મતે સ્વતંત્રતા દિવસ એટલે શું? એક રજા. એમાંય રવિ-સોમની આવી રજા આવી જાય એટલે જગ જીત્યા! આરામ કરવાનો, ફરવા જવાનું, સવારે ટીવીમાં ભાષણ જોવાનું (ઓપશનલ). બસ પતી ગયો સ્વતંત્રતા દિવસ!

સોશ્યલ દેશભક્તિ

એટલું જ નહીં સાથે જ સોશ્યલ મીડિયા પર તમામ દેશવાસીઓને શુભેચ્છા પાઠવવાની, ત્રિરંગી કપડા કે ધ્વજ લઇને સેલ્ફી પડવાનું અને પછી શેયર, લાઇક રમવાનું!

વોટ્સઅપ વાળી દેશભક્તિ

સ્વતંત્રતા દિવસ એટલે તે જ કે સવારથી તમામ ગ્રુપોમાં દેશભક્તિને ઝળકાઇ મૂકવાની? સવારમાં આસપાસના ચોકમાં પણ જોર જોરથી "એ મેરે વતન કે લોગો" વાળા ગીતનું બ્યૂગલ વાગતું કરી દેવાયાનું!

તો શું આ બધુ ખોટું છે?

ના, ઉપરોક્ત બધુ કરવામાં કંશુ જ ખોટું નથી. વોટ્સઅપ પર, ફેસબુક પર સ્વતંત્રતા દિવસની શુભેચ્છા પાઠવવી, પોતાની રીતે પોતાની આ આઝાદીને માણવી તે તો સારી જ વાત છે. કારણ કે ન હોવા કરતાં કંઇ હોવું...ધણીવાર બહુ જરૂરી બની જતું હોય છે.

તો પછી સવાલ કેમ?

આ સવાલ એટલા માટે છે કે આ સિવાય પણ કેટલાક લોકો છે....જે પોતાની ઇચ્છાએ આજના દિવસે અને મહિનામાં ધણીવાર ટ્રાફિક સિગ્નલ પર મફતની સેવા આપે છે....આ સવાલ એટલા માટે કારણ કે ધણા લોકો અભણ બાળકોને સાક્ષર કરવાનું...સ્વચ્છ ભારતનું કામ કરે છે. અને તે લોકો કંઇક બોલતા નથી...તે લોકો 15મી ઓગસ્ટની રાહ નથી જોતા...કે 15મી ઓગસ્ટ પતી ગયા પછી તે વાતને ભૂલી પણ નથી જતા....

એક જંગ હજી બાકી છે!

કારણ કે આપણને એક સ્વતંત્રતા તો મળી ગઇ છે પણ ભૂખમરો, સ્વચ્છતા, સાક્ષરતા જેવી ધણી સ્વતંત્રતા મેળવવાની બાકી છે...અને તે માટે લડશું નહીં...તો જીતશું નહીં!