'ધુરંધર'ના જે ગીત પર અક્ષય ખન્નાની એન્ટ્રી થઈ વાયરલ, જાણો તેની પાછળ અભિનેતાની મહેનત

Dhurandhar: અક્ષય ખન્નાની નવી ફિલ્મ 'ધુરંધર'માં 'રહેમાન ડાકુ'ના પાત્રની ચારે તરફ પ્રશંસા, સોશિયલ મીડિયા પર વાયરલ થઈ રહેલા 'FA9LA' ગીતના ડાન્સ સ્ટેપ્સ પાછળ એક્ટરની સખત મહેનત, ઓક્સિજનની કમી હોવા છતાં લદ્દાખમાં 2 કલાકમાં શૂટિંગ પૂર્ણ કર્યું.

અભિનેતા અક્ષય ખન્ના હાલમાં તેમની નવી ફિલ્મ 'ધુરંધર'માં ભજવેલા પ્રભાવશાળી પાત્ર 'રહેમાન ડાકુ'ને કારણે ચર્ચામાં છે. ફિલ્મમાં તેમના સંવાદો, અભિનય, એક્શન અને ખાસ કરીને 'FA9LA' ગીતમાં કરેલા ડાન્સ મૂવ્સે દર્શકોનું દિલ જીતી લીધું છે. સોશિયલ મીડિયા પર ખૂબ પસંદ કરવામાં આવી રહેલા આ સ્ટેપ્સ પાછળ એક મુશ્કેલ સંઘર્ષ છુપાયેલો હતો, જે તાજેતરમાં સામે આવ્યો છે.

લદ્દાખમાં ઓક્સિજન સિલિન્ડર સાથે શૂટિંગ

રિપોર્ટ અનુસાર, લદ્દાખમાં ચાલી રહેલા શૂટિંગ દરમિયાન ઊંચાઈ પર ઓક્સિજનનું સ્તર ઓછું હોવાને કારણે અક્ષય ખન્નાએ સતત એક નાનો ઓક્સિજન સિલિન્ડર પોતાની સાથે રાખવો પડ્યો હતો. તેમને દરેક શૉટ પછી ઓક્સિજન માસ્ક લગાવવો પડતો હતો. આ પડકાર હોવા છતાં, તેમણે સેટ પર પોતાની ઊર્જા જાળવી રાખી અને શાનદાર પર્ફોર્મન્સ આપ્યું.

ડાન્સ સીક્વન્સની કહાની

ફિલ્મનાં કોરિયોગ્રાફર વિજય ગાંગુલીએ જણાવ્યું કે, અક્ષય જે ડાન્સ સીક્વન્સમાં જોવા મળ્યા, તે મૂળરૂપથી સ્ક્રિપ્ટમાં નહોતો. દૃશ્ય માત્ર એટલો જ હતો કે રહેમાન ડાકુ સ્ટેજ પર આવીને સિંહાસન ગ્રહણ કરશે. પરંતુ સેટનું વાતાવરણ જોઈને અક્ષયે અચાનક થોડાં ડાન્સ સ્ટેપ્સ કરવાનું નક્કી કર્યું, જેના કારણે આખું દૃશ્ય જીવંત અને યાદગાર બની ગયું.

ગાંગુલીએ આગળ જણાવ્યું કે, શૂટિંગ દરમિયાન એક સમય એવો આવ્યો જ્યારે ઓછાં ઓક્સિજનને કારણે અક્ષયનું લેવલ ઘટી ગયું હતું, ત્યારબાદ ટીમ વધુ સતર્ક બની ગઈ હતી.

"દરેક ટેક પછી તેઓ આરામ કરતા અને ઓક્સિજન લેતા, પછી તરત જ પાછા શૂટ પર આવી જતા હતા. આટલા પડકારો છતાં, ગીતનું શૂટિંગ માત્ર બે કલાકમાં પૂરું કરવામાં આવ્યું."

કોરિયોગ્રાફરના જણાવ્યા મુજબ, પહેલો જ ટેક એટલો પરફેક્ટ હતો કે ટીમને લાગ્યું કે દૃશ્ય સરળતાથી પૂરું થઈ ગયું છે. આ ઝડપી અને અસરકારક શૂટિંગ અક્ષય ખન્નાના વ્યાવસાયિક વલણ અને સમર્પણનો પુરાવો છે.

અક્ષય ખન્નાએ આ વર્ષની શરૂઆતમાં ફિલ્મ 'છાવા'માં ઔરંગઝેબની ભૂમિકા માટે પણ ખૂબ પ્રશંસા મેળવી હતી, અને હવે 'ધુરંધર'માં તેમનો આ નવો અવતાર દર્શકોને ખૂબ પ્રભાવિત કરી રહ્યો છે.

English summary

Akshaye Khanna's improvisational dance in the 'Dhurandhar' song 'FA9LA' went viral. He shot the scene in Ladakh, needing an oxygen cylinder after every take due to low oxygen levels.