અમિતાભના જમાઈના ઈમેલ હૅકરે માંગ્યા લાખો પાઉંડ
મુંબઈ, 2 ઑગસ્ટ : અમિતાભ બચ્ચનના જમાઈ નિખિલ નંદાનું ઈમેલ ઍકાઉંટ કોઇકે હૅક કરી લીધું છે અને તે મેલ વડે તે હૅકરે નંદાના અનેક મિત્રો પાસેથી લાખો પાઉન્ડની માંગણી કરી નાંખી છે. નિખિલ નંદાએ આ અંગેની ફરિયાદ દિલ્હીની આર્થિક અપરાધ શાખામાં નોંધાવી છે.
નિખિલને તેમનું ઈમેલ હૅક થયાની માહિતી ત્યારે મળી કે જ્યારે તેમના મિત્રોએ તેમને ફોન કરી પૂછ્યું કે તેઓ આટલા બધા પૈસા કેમ માંગી રહ્યાં છે. જ્યારે નિખિલે પોતાનું ઍકાઉંટ ચેક કર્યું, ત્યારે તેમને ખબર પડી કે તેમનું ઈમેલ ઍકાઉંટ હૅક થઈ ગયું છે.
નિખિલ નંદા એસ્કૉર્ટ્સ જૂથના સંયુક્ત મૅનેજિંગ ડિરેક્ટર છે અને તેઓ દિલ્હીના જોરબાગ વિસ્તારમાં રહે છે. નિખિલે ગઈકાલે જ આ ફરિયાદ દિલ્હી પોલીસમાં નોંધાવી છે. દિલ્હી પોલીસની તપાસ મુજબ હૅકરે નંદાના મિત્રોને મેલ કરતાં લખ્યું છે કે તેઓ (નંદા) હાલ બ્રિટનના માન્ચેસ્ટર ખાતે છે અને ત્યાં તેમની ભત્રીજીની તબીયત બહુ ખરાબ થઈ છે. તેને હૉસ્પિટલમાં એડમિટ કરાઈ છે.