ન આવ્યાં રેખા, અમર સિંહ પણ ગેરહાજર
મુંબઈ, 11 ઑક્ટોબર : અટકળો તો એવી લગાવાઈ રહી હતી કે અમિતાભ બચ્ચનના જન્મ દિવસની પાર્ટી પ્રસંગે અભિનેત્રી રેખા પણ હાજર રહેશે, પરંતુ પાર્ટીમાં તેઓ દેખાયાં જ નહિં. બિગ બીનો જન્મ દિવસ આજે છે, પરંતુ ગઈકાલે રાત્રે આ પાર્ટી યોજવામાં આવી હતી.
તાજેતરમાં સમાચારો વહેતાં થયા હતાં કે અમિતાભની બર્થ ડે પાર્ટી તેમના ધર્મપત્ની જયા બચ્ચને યોજી છે. જયા રાજ્યસભાના સભ્ય છે. તેથી તેમણે આ પાર્ટીમાં બૉલીવુડની હસ્તીઓ સાથે રાજ્યસભાના સભ્યોને પણ આમંત્રિત કર્યા હતાં અને બૉલીવુડ હસ્તી તરીકે કદાચ નહિં, તો પણ રાજ્યસભાના સભ્ય તરીકે રેખા આ પાર્ટીમાં આમંત્રિત હતાં, પરંતુ તેઓ પાર્ટીમાં શોધ્યે ના જડ્યા.
રેખાની સાથે-સાથે એક વધુ શખ્સ એવા હતાં જેમની ગેરહાજરી ઉડીને આંખે વળગતી હતી. તે હતાં અમર સિંહ. અમિતાભને બડ઼ે ભૈયા કહેનાર અમર સિંહ આ પાર્ટીમાં બિગ બીને શુભેચ્છા પાઠવવા ન આવ્યાં.
બીજી બાજું અમિતાભને હંમેશા ભાંડનાર શત્રુઘ્ન સિન્હા સમગ્ર પરિવાર સાથે આ પાર્ટીમાં નજરે ચડ્યાં. અમિતાભને અભિનંદન પાઠવવા શશિ કપૂર પણ વ્હીલ ચૅરમાં પહોંચ્યા.