હવે ઇમરાન હાશમી કહેશે : દિલ હૈ કિ માનતા નહીં

Published: Tuesday, July 2, 2013, 17:02 [IST]

મુંબઈ, 2 જુલાઈ : 90ના દાયકાની સુપરહિટ ફિલ્મ દિલ હૈ કિ માનતા નહીંની રીમેક બનવા જઈ રહી છે અને તેમાં આમિર ખાનની ભૂમિકા સીરિયલ કિસર ઇમરાન હાશમી ભજવશે.

મહેશ ભટ્ટ દિગ્દર્શિત દિલ હૈ કિ માનતા નહીં ફિલ્મ 1991માં રિલીઝ થઈ હતી અને તેના તમામ ગીતો સુપરહિટ રહ્યા હતાં. ફિલ્મમાં મહેશ ભટ્ટના પુત્રી પૂજા ભટ્ટ તથા આમિર ખાને મુખ્ય ભૂમિકા ભજવી હતી. હવે દિલ હૈ કિ માનતા નહીંની રીમેક પણ મહેશ ભટ્ટ જ બનાવી રહ્યાં છે કે જેમાં આમિર ખાન દ્વારા કરાયેલ રોલ હવે ઇમરાન હાશમી કરશે.

જોકે એમ કહે છે કે ફિલ્મની મૂળ વાર્તા મૌલિક ફિલ્મ ઉપર જ આધારિત રહેશે, પણ દિગ્દર્શકે હજી કોઈ અંતિમ નિર્ણય નથી કર્યો. મહેશ ભટ્ટે એક નિવેદનમાં જણાવ્યું - મારી આ ફિલ્મ દિલ હૈ કિ માનતા નહીં ફ્રૅંક કાપ્રાની ફિલ્મ ઇટ હૈપન્ડ વન નાઇટ પર આધારિત હતી, પરંતુ તેમાં અભિનેતાના રોલ સાથે ન્યાય નહોતો કરાયો. રીમેકમાં અમે અભિનેતાના રોલ સાથે ન્યાય કરવા માંગીએ છીએ.

નોંધનીય છે કે પૂજા ભટ્ટ કે જેઓ હવે નિર્માતા બની ચુક્યાં છે, તેમણે ગત વર્ષે આલિયા ભટ્ટ તેમજ રણબીર કપૂર સાથે દિલ હૈ કિ માનતા નહીં ફિલ્મની રીમેક બનાવવાની ઇચ્છા વ્યક્ત કરી હતી.

Published On July 2, 2013