બહુ થયું સાસુ-વહુ, હવે આવે છે નણંદ-ભાભી
મુંબઈ, 7 જૂન : નાના પડદા ઉપર સાસુ-વહુ પર આધારિત સીરિયલોની ભરમાર છે. એક બંધ થાય, ત્યાં બીજી ચાર શરૂ થાય છે, પરંતુ હવે સ્ટાર પ્લસ લઈને આવી રહ્યું છે નણંદ-ભાભી પર આધારિત એક તદ્દન નવા કૉન્સેપ્ટ સાથેની સીરિયલ. આ સીરિયલ કંઇક હટકે હશે, કારણ કે કદાચ તેમાં નણંદ-ભાભીના ઝગડા નહીં, પણ બંને વચ્ચેનો પ્રેમ દર્શાવવામાં આવશે.
સ્ટાર પ્લસ ચૅનલ ઉપર ટુંકમાં જ આ સીરિયલ શરૂ થનાર છે કે જેનું ટાઇટલ એક નનદ કી ખુશિયોં કી ચાબી મેરી ભાભી રાખવામાં આવ્યું છે. આ સીરિયલ નણંદ અને ભાભીના સંબંધો ઉપર આધારિત હશે.
ક્યોંકિ સાસ ભી કભી બહુ થી સહિત અનેક એવી જ સીરિયલો ટેલીકાસ્ટ કરી ચુકેલા સ્ટાર પ્લસ ઉપર આ નવા કૉન્સેપ્ટ સાથે આવનાર સીરિયલમાં કંવલજીત સિંહ, સુપ્રિયા પિલગાંવકર જેવા જાણીતા કલાકારો ઉપરાંત વિપુલ ગુપ્તા, કાંચી કૌલ, રોહિત સાગર, શ્વેતા ગૌતમ, ઈશા કંસારા પણ હશે.
મળતી માહિતી મુજબ એક નનદ કી ખુશિયોં કી ચાબી મેરી ભાભી એટલે કે ઈએનકેકેકેએમબી સીરિયલ સ્ટાર પ્લસ ઉપર હાલ ચાલતી એક હજારોં મેં મેરી બહના હૈ સીરિયલનું સ્થાન લેશે કે જે બે બહેનોના સંબંધોની વાર્તા હતી. આ નવી સીરિયલ આ મહીને જ શરૂ થવાની શક્યતા છે.