AMTS નું 991 કરોડનું બજેટ રજૂ કરાયુ, 2030 સુધીમાં તમામ બસો એસી કરાશે
અમદાવાદ મ્યુનિસિપલ ટ્રાન્સપોર્ટ સર્વિસ (AMTS) દ્વારા વર્ષ 2026-27 માટે 991 કરોડનું બજેટ રજૂ કરવામાં આવ્યું છે. આ બજેટમાં શહેરના જાહેર પરિવહનને વધુ આધુનિક અને પર્યાવરણને અનુકૂળ બનાવવા પર વિશેષ ભાર મૂકવામાં આવ્યો છે.
અમદાવાદ કોર્પોરેશન સંચાલિત AMTS એ વર્ષ 2030 સુધીમાં શહેરની તમામ બસોને ઇલેક્ટ્રિક અને એસી બનાવવાનું લક્ષ્ય નિર્ધારિત કર્યું છે. આ યોજના હેઠળ પ્રદૂષણ ઘટાડવા અને મુસાફરોને પ્રીમિયમ સુવિધા આપવાનો મુખ્ય હેતુ રાખવામાં આવ્યો છે.
બજેટના કુલ 991 કરોડમાંથી 958 કરોડ મહેસૂલી ખર્ચ અને 33 કરોડ મૂડી ખર્ચ માટે ફાળવવામાં આવ્યા છે. તંત્રને વિવિધ સ્ત્રોતો દ્વારા 358 કરોડની આવકની અપેક્ષા છે, જેમાં કોર્પોરેશનની સહાયનો પણ સમાવેશ થાય છે.
વર્ષ 2026-27 દરમિયાન શહેરમાં કુલ બસોની સંખ્યા વધારીને 1,600 સુધી લઈ જવાનું આયોજન કરવામાં આવ્યું છે. સામાન્ય દિવસોમાં અંદાજે 1,492 જેટલી બસો રસ્તા પર દોડાવીને પરિવહન વ્યવસ્થાને વધુ મજબૂત બનાવવામાં આવશે.
ઇલેક્ટ્રિક બસોના કાફલાને વધારવા માટે 225 નવી ઇલેક્ટ્રિક બસો ખરીદવાનો વર્ક ઓર્ડર પણ આપી દેવામાં આવ્યો છે. આ પૈકી 25 બસો અત્યાર સુધીમાં મળી ચૂકી છે, જે ટૂંક સમયમાં સેવામાં કાર્યરત કરવામાં આવશે.
શહેરના સરખેજ જેવા આઉટર રિંગ રોડ પર મેટ્રો, BRTS અને GSRTC ના સમન્વય સાથે નવો બસ પોર્ટ બનાવવામાં આવશે. આ મલ્ટી-મોડલ ટ્રાન્સપોર્ટ હબથી મુસાફરોને એક જ સ્થળેથી તમામ સુવિધાઓ મળી રહેશે.
પર્યાવરણની જાળવણી માટે જમાલપુર, વાસણા અને મેમનગર જેવા ડેપો પર સોલર ચાર્જિંગ સ્ટેશન બનાવવાનું નક્કી કરાયું છે. આ ઉપરાંત મુસાફરોની સુવિધા માટે શહેરમાં 300 જેટલા નવા સુશોભિત ગ્રીન બસ શેલ્ટર્સ પણ બનાવવામાં આવશે.
સીનિયર સિટીઝન અને દિવ્યાંગો માટે AMTS માં મફત મુસાફરીની યોજના યથાવત રાખવામાં આવી છે. શ્રમયોગી કલ્યાણ બોર્ડમાં નોંધાયેલા શ્રમિકોને પણ વિનામૂલ્યે મુસાફરીનો લાભ આપવાની જાહેરાત આ બજેટમાં કરવામાં આવી છે.
વિદ્યાર્થીઓ માટે માસિક કન્સેશન પાસ અને મહિલાઓ માટે 20 માં ટિકિટની સુવિધા ચાલુ રહેશે. આ સાથે જ પ્રવાસન સ્થળો અને રિવરફ્રન્ટના બંને કાંઠે સ્પેશિયલ ઇલેક્ટ્રિક બસો દોડાવવાનું આયોજન છે.
Click it and Unblock the Notifications
Sign in with Google
