Ahmedabad: વીડિયો કોલમાં બનાવ્યો અશ્લીલ વીડિયો, યુવતી પર અનેક રીતે આચરી માનસિક ક્રુરતા

Ahmedabad: અમદાવાદ શહેરમાં ગુનાહિત પ્રવૃતિ સતત વધી રહી છે. ક્રાઈમ રેટમાં વધારો થવાની સાથે નાગરિકોની સુરક્ષા અંગે પણ ચિંતા વધી રહી છે. મહિલાઓની સુરક્ષા માટે અમદાવાદ પોલીસ સતત ઉમદા પગલા લઈ રહ્યા છે, તેમ છતા મહિલાઓ સામેના ગુના સતત વધી રહ્યા છે.

આ વચ્ચે એક ચોકાવનારો કિસ્સો સામે આવ્યો છે. અમદાવાદના બોપલ વિસ્તારમાં મહિલાને માનસિક રીતે હેરાન કરવાનો કિસ્સો સામે આવ્યો છે. બોપલ પોલીસે એક ફળ વેપારીને એક મહિલાને હેરાન કરવાના આરોપમાં ધરપકડ કરી છે.

આરોપીએ કથિત રીતે મહિલાને બ્લેકમેઈલ કરી હતી. વેપારીએ અશ્લીલ વીડિયો બનાવ્યા અને પૈસાની માંગણી કરી હતી. આ સાથે આ આરોપીએ તેને હાથની નસ કાપવા માટે મજબૂર કરી હતી.

અમદાવાદ ગ્રામ્ય એસપીએ મીડિયાને આ કેસ અંગે માહિતી આપતા જણાવ્યું હતું કે, સાહિલ સતારકર નામના વ્યક્તિની ધરપકડ કરવામાં આવી છે.

પોલીસના જણાવ્યા અનુસાર, તેણે તેના એક મિત્રની મદદથી પુણેમાં અભ્યાસ કરતી એક મહિલા સાથે મિત્રતા કરી હતી, જે બંને વચ્ચે સામાન્ય મિત્ર હતો.

આ પછી આરોપીએ મહિલા સાથે સોશિયલ મીડિયા પર વાત કરવાનું શરૂ કર્યું હતું. જે બાદ બંને ગોવામાં એક ટ્રેકિંગ કેમ્પમાં એકબીજાને મળ્યા હતા.

પોલીસે મીડિયાને જણાવ્યું હતું કે, આરોપીએ કથિત રીતે મહિલા સાથેની અંગત પળોનો વીડિયો બનાવ્યો, વીડિયો કોલ દરમિયાન તેના કપડાં ઉતારવા માટે દબાણ કર્યું અને તેને રેકોર્ડ કર્યું હતું. આ પછી આરોપીએ વીડિયોની મદદથી મહિલાને બ્લેકમેલ કરવાનું શરૂ કર્યું હતું.

આરોપી જ્યારે ઈચ્છે ત્યારે મહિલાને મળવા દબાણ કરતો હતો. તેણે વીડિયો કોલમાં મહિલાને તેના કાંડું કાપવા માટે પણ દબાણ કર્યું હતું.

તેણે મહિલા પાસેથી પૈસા પડાવી લીધા હતા, અને તેની પાસેથી 90,000 રૂપિયા પણ લીધા હતા.

જ્યારે મહિલાના પરિવારને આ સમગ્ર ઘટનાની જાણ થઈ, તો તેઓએ આ અંગે ભોપાલ પોલીસને ફરિયાદ કરી હતી. પોલીસે આરોપી વિરુદ્ધ વિવિધ કલમો હેઠળ ગુનો નોંધી તેની ધરપકડ કરી છે.