અમદાવાદીઓને મોટી રાહત, હવે AMTS-BRTS માં એક જ ટિકીટથી મુસાફરી કરી શકાશે
અમદાવાદ મ્યુનિસિપલ કોર્પોરેશન (AMC) ની સ્ટેન્ડિંગ કમિટીએ AMTS અને BRTS માટે સિંગલ મોબિલિટી સિસ્ટમ લાગુ કરવાના પ્રસ્તાવને મંજૂરી આપી છે. આ નિર્ણયથી મુસાફરો એક જ ટિકિટ અથવા કાર્ડનો ઉપયોગ કરી બંને જાહેર પરિવહન સેવાઓમાં મુસાફરી કરી શકશે. ચેરમેન દેવાંગ દાણીએ સમિતિની નિયમિત બેઠક બાદ આ જાહેરાત કરી.
તેમણે પત્રકારોને જણાવ્યું કે, દરરોજ છ લાખથી વધુ લોકો AMTS અને BRTS નો ઉપયોગ કરે છે, જે શહેરની જીવાદોરી છે. સીમલેસ, સમય-બચત અને ટેક્નોલોજી-આધારિત પ્રવાસ માટે એકીકૃત ટિકિટિંગ સિસ્ટમ મંજૂર કરાઈ છે. આનાથી અલગ ટિકિટો અને કતારોની જરૂરિયાત દૂર થશે. મુસાફરો સરળ સ્કેનિંગથી બસોમાં પ્રવેશી શકશે, જેનાથી કાર્યક્ષમતા અને સુવિધા વધશે.
આ પ્રોજેક્ટનો કુલ ખર્ચ 470 કરોડ છે, જે 12 મહિનામાં સંપૂર્ણપણે લાગુ થઈ જશે. આમાં ઓપરેશન અને મેન્ટેનન્સ (O&M) નો સમયગાળો પણ શામેલ છે. આમાં પાંચ વર્ષ પછીના તમામ હાર્ડવેર અને સોફ્ટવેર અપગ્રેડેશન અમલ કરતી એજન્સી વિનામૂલ્યે કરશે, જેથી સિસ્ટમ આધુનિક અને અદ્યતન રહે.
આ પહેલના ભાગરૂપે AMTS અને BRTS ના રૂટ અને કનેક્ટિવિટીની સંપૂર્ણ માહિતી આપવા માટે સંકલિત જર્ની પ્લાનર વિકસાવાશે. ભવિષ્યમાં, GSRTC, મેટ્રો, ભારતીય રેલવે, હાઈ-સ્પીડ રેલ તેમજ છેવાડાના વિસ્તારો માટે ઓટો-રીક્ષા અને કેબ સેવાઓ પણ આ પ્લેટફોર્મ સાથે જોડાશે.
સિસ્ટમમાં મોબાઇલ એપ્લિકેશન દ્વારા યુનિક QR કોડ મળશે, જેનાથી મુસાફરો સુવિધા મુજબ બેલેન્સ લોડ કરી શકશે અને મુસાફરી અનુસાર ભાડું આપોઆપ કપાશે. WhatsApp ચેટબોટ સુવિધા પણ શરૂ થશે, જે મુસાફરોને વિગતો દાખલ કરીને QR-આધારિત ટિકિટ મેળવવામાં મદદ કરશે.
Click it and Unblock the Notifications
Sign in with Google
