વાયબ્રન્ટ ગુજરાત વાયબ્રન્ટ આણંદ કાર્યક્રમમાં 1495 કરોડનાં એમઓયુ થયા
વાયબ્રન્ટ ગુજરાત અંતર્ગત રાજ્યના તમામ જિલ્લાઓમાં કાર્યક્રમો યોજાઈ રહ્યા છે. આ ક્રમમાં આણંદ ખાતે ઉદ્યોગ રાજ્યમંત્રી જગદીશ વિશ્વકર્માની ઉપસ્થિતિમાં 'વાયબ્રન્ટ ગુજરાત - વાયબ્રન્ટ આણંદ કાર્યક્રમ યોજાયો હતો.
આણંદ ખાતે યોજાયેલા આ કાર્યક્રમમાં જિલ્લાના 78 એકમો સાથે રૂપિયા 1495 કરોડનાં એમઓયુ સાઈન કરવામાં આવ્યા.
અહીં ઉદ્યોગ રાજ્યમંત્રી જગદીશ વિશ્વકર્માએ કહ્યું કે, વિશ્વભરના રોકાણકારોને ગુજરાતમાં આકર્ષવા વાઇબ્રન્ટ ગુજરાત ગ્લોબલ સમિટ 20 વર્ષ બાદ વટવૃક્ષ બની દેશની સાથે વિશ્વભરના રોકાણકારોને ગુજરાત તરફ આકર્ષી રહ્યું છે.
તેમણે કહ્યું કે, વાઈબ્રન્ટ ગુજરાતના લીધે આજે ગુજરાત રોકાણકારો માટે બેસ્ટ ઈન્વેસ્ટમેન્ટ ડેસ્ટિનેશન બનવાની સાથે દેશનું ગ્રોથ એન્જીન બન્યું છે. વાઈબ્રન્ટ ગુજરાત ગ્લોબલ સમિટના પરીણામે દેશના જીડીપીમાં ગુજરાતનો હિસ્સો ૮.૪ ટકા થયો છે, આ ઉપરાંત દેશના ઔદ્યોગિક ઉત્પાદનમાં ૧૮ ટકા અને દેશની કુલ નિકાસમાં ૩૩ ટકા હિસ્સો ગુજરાત ધરાવે છે.
તેમણે કહ્યું કે, આવનારા વર્ષોમાં ગુજરાત ગ્રીન હાઇડ્રોજન હબ બનીને વિશ્વના ક્લાયમેટ ચેન્જના પડકારો સામે અને ગ્લોબલ સસ્ટેનેબીલિટીમાં પોતાનું યોગદાન આપવા માટે તૈયાર છે. અહીં તેમણે ગુજરાત પોતાની આવી ક્ષમતાઓ ઉજાગર કરીને દુનિયાના દેશો માટે ગેટ વે ટુ ધી ફ્યુચર બનવા સજ્જ હોવાનો દ્રઢ વિશ્વાસ પણ વ્યક્ત કર્યો.
આણંદના ઔદ્યોગિક વિકાસની વાત કરતા તેમણે કહ્યું કે, દેશને શ્વેતક્રાંતિની ભેટ આપનાર અમુલ દેશની સૌથી મોટી દુધ ઉત્પાદક કંપની બની છે, જેણે ભારતને વિશ્વનો સૌથી મોટો દૂધ ઉત્પાદક દેશ બનાવવામાં મહત્વનો ભાગ ભજવ્યો છે. મિલ્કસિટી તરીકે ઓળખાતા આણંદ જિલ્લાએ એન્જીનિયરીંગ, ફાર્માસ્યુટિકલ, કેમિકલ, ડેરી ઉદ્યોગ, ખેત ઉત્પાદન સહિતના ક્ષેત્રે પણ ઉડીને આંખે વળગે તેવો વિકાસ કર્યો છે.
અહીં સાંસદ મિતેષ પટેલે જણાવ્યું કે, બે દાયકા પૂર્વે શરૂ થયેલી વાઈબ્રન્ટ ગુજરાતની સફર બહુ જ નાના પાયે અમદાવાદ ખાતેથી શરૂ થઈને આજે વિશ્વના મુખ્ય ફલક પર પહોંચી છે તે આપણા સૌના માટે ગર્વની બાબત છે. વાઇબ્રન્ટ ગુજરાત, વાઇબ્રન્ટ આણંદનો આ કાર્યક્રમ આપણને એ જ સફરને આગળ ધપાવવા માટે પ્રેરે છે.
Click it and Unblock the Notifications
Sign in with Google
