ગુજરાતમાં હજુ કેટલા દિવસ વરસાદ? જાણો હવામાન વિભાગની આગાહી

અરબી સમુદ્રમાં સર્જાયેલી સિસ્ટમ હવે પશ્ચિમ તરફ ફંટાઈને ઓમાન તરફ આગળ વધી રહી છે. જો કે, તેની અસર હજુ પણ ગુજરાતમાં વર્તાશે, જેના કારણે રાજ્યના ઘણા વિસ્તારોમાં વરસાદ થવાની સંભાવના છે. આ સિસ્ટમને કારણે ગુજરાતના વાતાવરણમાં નોંધપાત્ર ફેરફાર જોવા મળ્યો છે.

મોટાભાગના વિસ્તારોમાં વાદળછાયું વાતાવરણ છે, જ્યારે દક્ષિણ ગુજરાત અને સૌરાષ્ટ્રના કેટલાક જિલ્લાઓમાં વરસાદ નોંધાયો છે. ખાસ કરીને સૌરાષ્ટ્ર અને દક્ષિણ ગુજરાત આ સિસ્ટમથી વધુ પ્રભાવિત થયા છે. હવામાન વિભાગે આગામી દિવસો માટે વિવિધ જિલ્લાઓમાં વરસાદની આગાહી કરી છે.

સૌરાષ્ટ્રના ગીર સોમનાથ, અમરેલી, પોરબંદર, રાજકોટ, સુરેન્દ્રનગર, બોટાદ અને ભાવનગરમાં હજુ પણ વરસાદની સંભાવના છે. દક્ષિણ ગુજરાતમાં વલસાડ, નવસારી, તાપી, ભરૂચ, ડાંગ અને નર્મદામાં ભારે વરસાદનું અનુમાન છે.

મધ્ય અને ઉત્તર ગુજરાતના કેટલાક જિલ્લાઓમાં છૂટોછવાયો વરસાદ વરસી શકે છે. છોટાઉદેપુર, પંચમહાલ, દાહોદ, મહિસાગર, અરવલ્લી, ખેડા અને આણંદમાં પણ હળવાથી ભારે વરસાદની શક્યતા છે.

હવામાન વિભાગના અનુમાન અનુસાર, 26 અને 27 ઓક્ટોબરના રોજ ગુજરાતમાં વરસાદનું પ્રમાણ વધુ રહેશે. સિસ્ટમ ઓમાન તરફ આગળ વધતાં ગુજરાતમાં વરસાદ ઘટશે, પરંતુ આગામી આખા સપ્તાહ દરમિયાન વાદળછાયું વાતાવરણ અને ક્યાંક હળવાથી મધ્યમ વરસાદ ચાલુ રહેશે.

આરબી સમુદ્રમાં સર્જાયેલા ડિપ્રેશનના કારણે રાજ્યમાં ભારે વરસાદની આગાહી કરવામાં આવી છે. આજે ભાવનગર, અમરેલી અને બોટાદ જિલ્લાઓ માટે ઓરેન્જ એલર્ટ જાહેર કરાયું છે, જે ભારે વરસાદની સંભાવના દર્શાવે છે.

આજે રાજ્યના 24 જિલ્લામાં યલો એલર્ટ જાહેર કરાયું છે. જેમાં અરવલ્લી, મહિસાગર, દાહોદ, ખેડા, આણંદ, વડોદરા, છોટાઉદેપુર, પંચમહાલ, ભરૂચ, નર્મદા, સુરત, તાપી, નવસારી, ડાંગ, વલસાડ, દમણ, દાદરાનગર હવેલી, અમદાવાદ, સુરેન્દ્રનગર, રાજકોટ, જૂનાગઢ, પોરબંદર, ગીર સોમનાથ અને દીવનો સમાવેશ થાય છે.

English summary

An Arabian Sea weather system is progressing towards Oman, impacting Gujarat's weather with significant rainfall expected in various districts. The Meteorological Department has issued alerts for heavy rain in southern and Saurashtra regions, with a continued chance of scattered rainfall across the state.