CM રૂપાણીએ ગાડીનો કાફલો થોભાવી અકસ્માતગ્રસ્તોની કરી મદદ

મુખ્યમંત્રી વિજય રૂપાણીએ ગાંધીનગર હાઇવે પર પોતાની ગાડીઓને કાફલો રોકી અકસ્માતગ્રસ્ત પરિવારની મદદ કરી હતી.

By Shachi

Published: Sunday, June 4, 2017, 18:21 [IST]

ગુજરાતના મુખ્યમંત્રી વિજય રૂપાણીની સરળતા અને માનવતાની સાબિતી આપતો એક બનાવ સામે આવ્યો છે. પ્રાપ્ત માહિતી અનુસાર વિજય રૂપાણી ગાંધીનગર હાઇવે પરથી પસાર થઇ રહ્યાં હતા એ દરમિયાન હાઇવે પર સર્જાયેલ એક અકસ્માત પર તેમની નજર પડી. પોતાની સુરક્ષાની ચિંતા કર્યા વગર વિજય રૂપાણીએ પોતાની ગાડી થોભાવી અને અકસ્માતમાં ઘાયલ લોકોની મદદે પહોંચ્યા.

રવિવારના રોજ ગાંધીનગર-કોબા હાઇવે પર એક રિક્ષા પલટાઇ જતાં અકસ્માત સર્જાયો હતો અને તેને કારણે રોડ પર ટ્રાફિક જામ થઇ ગયો હતો. વિજય રૂપાણીના ધ્યાનમાં આ બનાવ આવતાં તેમણે તુરંત પોતાની ગાડીનો કાફલો થંભાવી ઇજાગ્રસ્તોની મદદ આગળ આવ્યા હતા. એક ઇજાગ્રસ્ત મહિલાને તેમણે પોતાના કાફલાની એક ગાડીમાં હોસ્પિટલ મોકલી હતી.

રવિવારના રોજ જ મુખ્યમંત્રી વિજય રૂપાણીએ અમદાવાદ ખાતે રેડ ક્રોસ ભવનનું ઉદઘાટન કર્યું હતું. ગુજરાત સરકારના સહયોગથી ગુજરાત રોડ ક્રોસ થેલેસિમિયા પ્રિવેન્શન પ્રોગ્રામમાં અસરકારક કામગીરી બજાવી રહ્યું છે. આ સાથે જ રેડ ક્રોસ બ્લડ બેંકને મોબાઇલ બ્લડ બેંક કલેક્શન વાનનું પણ વિતરણ કરવામાં આવ્યું હતું.