Cyclone Shakti : વાવાઝોડું શક્તિ ગંભીર વાવાઝોડામાં ફેરવાયુ, આ જિલ્લાઓમાં ભારે વરસાદનો ખતરો

Cyclone Shakti : અરબી સમુદ્રમાં સર્જાયેલું વાવાઝોડું શક્તિ (Shakti Cyclone) હવે વધુ જોખમી બની ગયું છે. હવામાન વિભાગના તાજેતરના અહેવાલ મુજબ, આ વાવાઝોડું હવે ગંભીર (Severe) શ્રેણીના વાવાઝોડુંમાં પરિવર્તિત થઈ ગયું છે.

આ ગંભીર પરિવર્તનને કારણે ભારતના પશ્ચિમી દરિયાકાંઠાના વિસ્તારોમાં મોટી અસર થવાની સંભાવના છે. આનાથી ગુજરાત સહિત ઘણા રાજ્યોમાં ભારે વરસાદ, વાવાઝોડા સાથે વરસાદ અને કેટલાક નીચાણવાળા વિસ્તારોમાં પૂર (Flood) જેવી સ્થિતિ ઊભી થવાનો મોટો ભય વ્યક્ત કરવામાં આવ્યો છે.

વાવાઝોડા શક્તિની સૌથી વધુ અને સીધી અસર મહારાષ્ટ્ર (Maharashtra) અને ગુજરાત (Gujarat) ના દરિયાકાંઠાના જિલ્લાઓ પર જોવા મળશે. ગુજરાતના મુખ્ય જિલ્લાઓ જેવા કે દ્વારકા, જામનગર અને સુરતમાં વાવાઝોડાની અસરને પગલે તકેદારી રાખવાની ચેતવણી જાહેર કરવામાં આવી છે અને સ્થાનિક વહીવટી તંત્રને એલર્ટ રહેવાની સૂચના અપાઈ છે.

મહારાષ્ટ્રમાં પણ ગંભીર હવામાનની આગાહીને પગલે મુંબઈ, થાણે, પાલઘર, રાયગઢ, રત્નાગિરિ અને સિંધુદુર્ગ સહિતના દરિયાકાંઠાના અને નજીકના જિલ્લાઓમાં હાઈ એલર્ટ જાહેર કરવામાં આવ્યું છે.

આ ઉપરાંત, તમિલનાડુ (ચેન્નાઈ), દિલ્હી, બિહાર અને હિમાચલ પ્રદેશ જેવા રાજ્યોમાં પણ હવામાનમાં મોટો પલટો આવવાની સંભાવના વ્યક્ત કરાઈ છે.

હવામાન વિભાગના જણાવ્યા અનુસાર, વાવાઝોડું હાલમાં ઓમાનના રાસ અલ હદ્દથી આશરે 250 કિલોમીટર દક્ષિણપૂર્વ દિશામાં સક્રિય છે.

તે 6 ઓક્ટોબરની સવાર સુધી પશ્ચિમ-દક્ષિણપશ્ચિમ દિશામાં આગળ વધતું રહેશે, ત્યારબાદ તે નબળું પડીને પૂર્વ તરફ વળે તેવી શક્યતા છે. આ દરમિયાન પવનની સામાન્ય ગતિ 45-55 કિલોમીટર પ્રતિ કલાકની વચ્ચે રહેશે, પરંતુ કેટલાક સ્થળોએ તે વધીને 65 કિમી પ્રતિ કલાક કે તેથી વધુની ઝડપે પણ પહોંચી શકે છે.

ખાસ કરીને મુંબઈ, પુણે અને થાણે જેવા શહેરોમાં 7 ઓક્ટોબર સુધી પવનની ગતિ 45 થી 65 કિલોમીટર પ્રતિ કલાકની આસપાસ રહેવાનો અંદાજ છે.

English summary

Cyclone Shakti Turns Severe: Heavy Rain and Flood Alert for Gujarat, Maharashtra Coast