ભાજપની પ્રદેશ બેઠકમાં થશે પક્ષની કામગીરીના લેખાંજોખાં
આ અંગે વાત કરતા ભાજપના પ્રદેશ પ્રવકતા આઇ. કે. જાડેજાએ જણાવ્યું છે કે તાજેતરમાં યોજાયેલી ગુજરાત વિધાનસભા ચૂંટણી 2012માં ગુજરાતની જનતાએ ભાજપને ભવ્ય વિજય અપાવી મુખ્યમંત્રી નરેન્દ્રભાઈ મોદીના નેતૃત્વમાં લગલગાટ ત્રીજો વિજય અપાવ્યો છે. આ વાતાવરણમાં ભાજપની 'પ્રદેશ બેઠક' મહત્વની બની રહેશે.
આ બેઠક ૩ જાન્યુઆરીના રોજ પ્રદેશ પ્રમુખ આર. સી. ફળદુની અધ્યક્ષતામાં ગાંધીનગર ખાતે મળશે. ગાંધીનગર સ્ટાફ ટ્રેનીંગ કોલેજ ખાતે મળનારી આ પ્રદેશ બેઠકમાં ગુજરાત રાજયના મુખ્યમંત્રી નરેન્દ્રભાઈ મોદી, ભાજપના રાષ્ટ્રીય ઉપાધ્યક્ષ પરશોત્તમભાઈ રૂપાલા, રાષ્ટ્રીય સહ સંગઠન મહામંત્રી વી. સતીષજી સહિતના આગેવાનો ઉપસ્થિત રહી ભિન્ન ભિન્ન વિષયો પર માર્ગદર્શન આપશે.
ગાંધીનગર ખાતે વિધાનસભાની ચૂંટણી બાદ યોજાનારી આ મહત્વની બેઠકમાં સંગઠન પર્વ, જીલ્લા પંચાયત અને નગરપાલિકાની આવી રહેલી ચૂંટણી સહિતના મુદ્દાઓ પર ચર્ચા હાથ ધરવામાં આવશે. આ બેઠકમાં ભાજપાના પ્રદેશ હોદ્દેદારો, વિવિધ મોરચાના પ્રમુખો, સેલના પ્રદેશ કન્વીનર - સહ કન્વીનરો, જીલ્લા ઇન્ચાર્જો તેમજ જીલ્લા પ્રમુખ - મહામંત્રીઓ ઉપસ્થિત રહેશે.