Gujarat Election: રાજ્યમાં આ જગ્યાઓએ ઈવીએમ ખોટવાયા, મતદારો લાઈનમાં અકળાયા
લોકોના ઉત્સાહ વચ્ચે રાજ્યમાં ઘણી જગ્યાએ ઈવીએમ ખોટવાયા હતા.
Gujarat Election: ગુજરાત વિધાનસભા ચૂંટણીનુ પહેલા તબક્કાનુ મતદાન સૌરાષ્ટ્ર-કચ્છ અને દક્ષિણ ગુજરાતના 19 જિલ્લાની 89 બેઠકો પર ચાલી રહ્યુ છે. સવારથી જ લોકોમાં મતદાન કરવા માટે ઉત્સાહ જોવા મળી રહ્યો છે. ઘણી જગ્યાએ કડકડતી ઠંડીમાં પણ લોકો મતદાન કરવા પહોંચી ગયા હતા. લોકશાહીના પર્વમાં ભાગ લેવા માટે લોકો ઉમટી પડ્યા છે.
લોકોના ઉત્સાહ વચ્ચે રાજ્યમાં ઘણી જગ્યાએ ઈવીએમ ખોટવાયા હતા. રાજ્યમાં પહેલુ ઈવીએમ વાપીના 193 નંબરના બુથ પર ખોટવાયુ હોવાની ફરિયાદ મળી હતી. મૉકપોલ વખતે ઈવીએમ ખોટવાયુ હોવાનુ ધ્યાનમાં આવતા જ જિલ્લા ચૂંટણી અધિકારીની ટીમને ઘટનાની જાણ કરાઈ અને ઈવીએમ બદલવાની કાર્યવાહી હાથ ધરવામાં આવી. વળી, ઉનાઈ ગામે બંને મતદાન મથકો પર ઈવીએમ ખોટવાયાની માહિતી સામે આવી. ઈવીએમ ખરાબ થતા અડધો કલાક જેટલા સમય સુધી મતદારોએ લાઈનમાં ઉભુ રહેવુ પડ્યુ હતુ.
ગોંડલ ભગવતપાર શાળા નંબર 5 ખાતે બુથ નંબર 135માં ઈવીએમ મશીનમાં ખામી સર્જાઈ હતી. જે બાદ લોકોમાં રોષ જોવા મળ્યો હતો. ગોંડલ નગરપાલિકાના સભ્ય ચંદુભાઈ ડાભીને જાણ થતા તેમણે બુથ પર પહોંચીને વહીવટી તંત્રને જાણ કરી હતી. વળી, વીવી પેટમાં પણ ખામી સર્જાતા ટીમ કામે લાગી હતી. ઝઘડિયા વિધાનસભા બેઠક પર ઉચેડિયા ગામના મતદાન બુથ નંબર 1 પર ઈવીએમ મશીન બગડતા તાત્કાલિક ઈવીએમ મશીનના બદલે બીજુ મશીન ફાળવવામાં આવ્યુ હતુ.
તમને જણાવી દઈએ કે 11 વાગ્યા સુધીમાં સરેરાશ 19 ટકા મતદાન નોંધાયુ છે. 9.30 વાગ્યા સુધીમાં સરેરાશ 4.92 ટકા મતદાન નોંધાયું છે. પોરબંદર જિલ્લાનુ 9.30 વાગે સૌથી ઓછુ 3.92 ટકા અને ડાંગ જિલ્લાનુ સૌથી વધુ 7.78 ટકા મતદાન નોંધાયુ હતુ. જ્યારે ઇટાલિયાની કતારગામ સીટ પર સૌથી ઓછુ 1.41 ટકા જ મતદાન થયુ છે. જ્યારે લિંબાયતમાં 2.87 ટકા મતદાન સાથે સૌથી ઓછા મતદાનમાં બીજા ક્રમે છે. સંગીતા પાટીલની સીટ છે.