ગુજરાત વિધાનસભા ચૂંટણી 2012 દિવાળી બાદ બે તબક્કામાં યોજાવાની સંભાવના

Updated: Wednesday, November 5, 2014, 16:34 [IST]

ગાંધીનગર, 20 સપ્ટેમ્બર : ગુજરાતમાં ચૂંટણીના પડઘમ વધારે તેજ બન્યા છે. ગુજરાતના મુખ્ય પક્ષ ભાજપ અને કોંગ્રેસ ચૂંટણીની ટક્કર ઝેલવા માટે અત્યારથી જ સામસામે આવી ગયા છે ત્યારે ગાંધીનગરના સૂત્રોના જણાવ્યા અનુસાર ગુજરાત વિધાનસભા ચૂંટણી 2012 નવેમ્બરમાં દિવાળી બાદ યોજાઇ શકે છે. મહત્વની બાબત એ પણ છે કે ચૂંટણી એક નહીં પણ બે તબક્કામાં યોજાવાની સંભાવના વ્યક્ત કરવામાં આવી છે.

ગુજરાતની ચૂંટણીના ધ્યાનમાં રાખીને ભાજપ અને કોંગ્રેસ દ્વારા છેલ્લા એક વર્ષથી અનેક પ્રકારે મતદારોને આકર્ષવા માટે પાર્ટીએ આપેલા લાભ અને વિકાસની વાતો કરવાની શરૂ કરી દીધી છે. આ વખતે વિકાસ અને ભ્રષ્ટાચાર મુખ્ય ચૂંટણી મુદ્દા બની રહ્યા છે ત્યારે બંને પક્ષોએ એક બીજા ઉપર આક્ષેપબાજી શરૂ કરી મતદારોને પોતાની તરફ આકર્ષવાનું શરૂ કર્યું છે.

આ વર્ષે યોજાનારા ગુજરાત વિધાનસભાની ચૂંટણી પ્રથમવાર નવા સીમાંકન પ્રમાણે યોજાવા જઇ રહી છે ત્યારે બદલાયેલા મતદાર સમીકરણોને લાભ કયો પક્ષ સૌથી વધારે મેળવી શકે છે તેના પર સૌની નજર છે. નવા મત વિસ્તારોને ધ્યાનમાં રાખીને પક્ષોએ નવો વ્યૂહ ઘટ્યો છે.

ગુજરાત વિધાનસભા ચૂંટણી 2012 વધારે રસાકસી ભરી બની રહે તેવી સંભાવના છે. કારણ કે આ વખતે ભાજપના અસંતુષ્ટોએ ગુજરાતના પૂર્વ મુખ્ય મંત્રી અને પટેલ સમાજના અગ્રણી આગેવાન કેશુભાઇ પટેલની આગેવાનીમાં ગુજરાત પરિવર્તન પાર્ટીની રચના કરી છે. તેઓ ગુજરાતમાં તમામ બેઠકો પરથી ઉમેદવારોને ચૂંટણીમાં ઉભા રાખશે. ઉપરાંત ગુજરાત બહારના પક્ષો જેવા કે જદયુ, રાજપા, સપા, લોજપા વગેરે અગાઉની ચૂંટણીઓની સરખામણીમાં વધારે બેઠકો પર ઉમેદવારો ઉતારવાનું વિચારી રહ્યા છે.