ખાનગી વીજ કંપનીઓના ભરોસે સરકાર, બે વર્ષમાં 45,933 કરોડની વીજળી ખરીદી

ગુજરાત સરકાર રાજ્યની વીજ જરૂરિયાત પૂરી કરવા માટે હજુ પણ મોટાપાયે ખાનગી ઉત્પાદકો પર નિર્ભર હોવાનું સામે આવ્યું છે. છેલ્લા બે વર્ષના આંકડા મુજબ સરકારે ખાનગી એકમો પાસેથી કુલ 1,01,161 મિલિયન યુનિટ વીજળીની ખરીદી કરી છે.

રાજ્ય સરકારે વર્ષ 2024માં 48,808 મિલિયન યુનિટ અને વર્ષ 2025માં વધીને 52,353 મિલિયન યુનિટ વીજળી ખાનગી કંપનીઓ પાસેથી લીધી છે. આ આંકડા દર્શાવે છે કે રાજ્યમાં વીજળીનો વપરાશ અને તેની માંગ સતત વધી રહી છે.

ખર્ચની દ્રષ્ટિએ જોઈએ તો, વર્ષ 2024માં વીજળી ખરીદવા માટે સરકારે 22,503 કરોડ ચૂકવ્યા હતા. જ્યારે વર્ષ 2025માં આ આંકડો વધીને 23,430 કરોડ સુધી પહોંચી ગયો છે, જે વીજ નિર્ભરતા સૂચવે છે.

વીજળીના ભાવમાં થોડો ઘટાડો પણ જોવા મળ્યો છે, જેમાં 2024માં સરેરાશ ભાવ 4.61 પ્રતિ યુનિટ હતો. જ્યારે વર્ષ 2025માં આ ભાવ ઘટીને સરેરાશ 4.48 પ્રતિ યુનિટ થયો હોવાનું સરકારી રેકોર્ડ પરથી જણાય છે.

આમ, છેલ્લા બે વર્ષમાં કુલ 45,933 કરોડના ખર્ચે વીજળી ખરીદીને સરકારે નાગરિકોની જરૂરિયાત સંતોષી છે. જોકે, ખાનગી પાવર પ્લાન્ટ્સ પરની આટલી મોટી નિર્ભરતા હવે ચર્ચાનો વિષય બની રહી છે.

English summary

Gujarat's electricity mix increasingly depends on private power producers to cover rising demand. The state purchased substantial energy from private units in 2024 and 2025, with costs increasing and overall prices showing a marginal decline year on year. The data highlights ongoing reliance on private capacity for state electricity security.