Gujarat rain : ઓગસ્ટમાં કેવો વરસાદ પડશે? અંબાલાલ પટેલની મોટી આગાહી

Gujarat rain : ગુજરાતમાં ચોમાસાની સિઝન જામી છે અને આગામી દિવસોમાં વરસાદની સ્થિતિ કેવી રહેશે તે અંગે હવામાન નિષ્ણાત અંબાલાલ પટેલ અને હવામાન વિભાગે મહત્વની આગાહીઓ કરી છે.

ઓગસ્ટ મહિનામાં રાજ્યમાં ભારેથી અતિભારે વરસાદની શક્યતાઓ વ્યક્ત કરવામાં આવી છે, જે ખેડૂતો અને સામાન્ય જનતા માટે રાહતના સમાચાર છે.

હવામાન નિષ્ણાત અંબાલાલ પટેલના મતે ઓગસ્ટ મહિનો ગુજરાત માટે સારો વરસાદ લઈને આવશે.

ઓગસ્ટના પ્રથમ સપ્તાહમાં રાજ્યના કેટલાક ભાગોમાં ભારે વરસાદી ઝાપટાં પડી શકે છે. ખાસ કરીને 3 ઓગસ્ટ આસપાસ રાજ્યના છૂટાછવાયા વિસ્તારોમાં વરસાદ થવાની સંભાવના છે.

6 થી 10 ઓગસ્ટ દરમિયાન ગુજરાતમાં ભારે વરસાદની શક્યતા છે. 18 ઓગસ્ટ પછી રાજ્યમાં ફરીથી ભારે વરસાદ જોવા મળશે. અંબાલાલ પટેલના મતે, 18મી ઓગસ્ટથી 22 ઓગસ્ટની વચ્ચે બંગાળના ઉપસાગરમાં એક મજબૂત સિસ્ટમ બનશે, જે ગુજરાતમાં સારો વરસાદ લાવશે.

10 ઓગસ્ટની આસપાસ અરબી સમુદ્ર પણ સક્રિય થવાની સંભાવના છે, જેના કારણે ગુજરાતમાં ભારેથી અતિભારે વરસાદ વરસી શકે છે.

હવામાન વિભાગે પણ આગામી દિવસો માટે વરસાદની આગાહી કરી છે. હવામાન વિભાગ અનુસાર, આગામી 7 દિવસ સુધી રાજ્યમાં સાર્વત્રિક વરસાદની શક્યતા છે.

દરિયાકાંઠાના વિસ્તારોમાં રહેતા નાગરિકો અને માછીમારો માટે ચેતવણી જાહેર કરવામાં આવી છે. હવામાન વિભાગે આગામી 3 દિવસ સુધી માછીમારોને દરિયો ન ખેડવા સૂચના આપી છે.

ચાલુ સિઝનમાં ગુજરાતમાં સરેરાશ 62.44 ટકા વરસાદ નોંધાઈ ચૂક્યો છે, જે રાજ્ય માટે એકંદરે સંતોષકારક સ્થિતિ દર્શાવે છે.

• સૌરાષ્ટ્ર : આ સિઝનમાં સૌરાષ્ટ્રમાં સરેરાશ 55 ટકા વરસાદ થયો છે.
• કચ્છ : કચ્છ ઝોનમાં સિઝનનો 64.17 ટકા વરસાદ નોંધાયો છે.
• દક્ષિણ ગુજરાત : દક્ષિણ ગુજરાતમાં સરેરાશ 65.70 ટકા વરસાદ પડ્યો છે.
• ઉત્તર ગુજરાત : ઉત્તર ગુજરાતમાં સરેરાશ 65.17 ટકા વરસાદ નોંધાયો છે.

English summary

Ambalal Patel's Big August Rain Forecast for Gujarat