Weather News: ગુજરાતમાં ફરી માવઠાનું સંકટ, આ તારીખે કમોસમી વરસાદની આગાહી
Weather News: રાજસ્થાન પર સર્જાયેલા સાયક્લોનિક સર્ક્યુલેશનની અસરથી ગુજરાતમાં વાતાવરણમાં પલટો આવશે, 5 અને 6 ડિસેમ્બરે ઉત્તર, દક્ષિણ ગુજરાત, સૌરાષ્ટ્ર-કચ્છના કેટલાક વિસ્તારોમાં છૂટોછવાયો વરસાદ પડી શકે છે.
ગુજરાતમાં હાલમાં શિયાળો શરૂ થયો હોવા છતાં લઘુત્તમ તાપમાન હજી એટલું ઘટ્યું નથી, જેના કારણે ઠંડીનો ચમકારો ઓછો છે. જોકે, હવામાન વિભાગે આગાહી કરી છે કે આગામી 24 કલાક બાદ રાજ્યના તાપમાનનો પારો 2 થી 3 ડિગ્રી ગગડે તેવી શક્યતા છે, જેના કારણે ઠંડીમાં વધારો થશે.
પરંતુ આ વચ્ચે ગુજરાત પર કમોસમી વરસાદનું સંકટ મંડરાઈ રહ્યું છે.
5 અને 6 ડિસેમ્બરે વરસાદની સંભાવના
હવામાન વિભાગના જણાવ્યા અનુસાર, હાલમાં રાજસ્થાન પર એક સાયક્લોનિક સર્ક્યુલેશન સિસ્ટમ સક્રિય થઈ છે. તેની અસરને કારણે ગુજરાતના વાતાવરણમાં પલટો આવી શકે છે અને ડિસેમ્બરની શરૂઆતમાં કમોસમી વરસાદ પડી શકે છે.
- ક્યારે વરસાદ: 5 અને 6 ડિસેમ્બરના રોજ વાદળછાયા વાતાવરણ વચ્ચે છૂટાછવાયા વરસાદની શક્યતા છે.
- ક્યાં અસર: ઉત્તર ગુજરાત, દક્ષિણ ગુજરાત, કચ્છ અને સૌરાષ્ટ્રના કેટલાક વિસ્તારોમાં વાદળછાયું વાતાવરણ રહેશે અને છૂટોછવાયો વરસાદ વરસી શકે છે.
ચક્રવાત 'Ditwah'નું તાજેતરનું અપડેટ
એક તરફ ગુજરાતમાં માવઠાની શક્યતા છે, તો બીજી તરફ દક્ષિણ ભારતમાં 'ડિટવાહ' (Cyclone Ditwah) વાવાઝોડાનો ખતરો છે.
- સ્થાન: શનિવારે સવારે 2:30 વાગ્યે વાવાઝોડાનું કેન્દ્ર ત્રિંકોમાલીથી 80 કિમી ઉત્તરપશ્ચિમમાં અને ચેન્નાઈથી લગભગ 430 કિમી દક્ષિણમાં સ્થિત હતું.
- ગતિ: તેની ગતિ 7 કિમી પ્રતિ કલાક નોંધાઈ છે અને તે ઉત્તર-ઉત્તરપશ્ચિમ તરફ આગળ વધી રહ્યું છે.
- લેન્ડફોલ: ચક્રવાતની અસર 30 નવેમ્બર ના રોજ ઉત્તરી તમિલનાડુ, પુડુચેરી અને દક્ષિણ આંધ્રપ્રદેશના દરિયાકાંઠા પર અનુભવાઈ શકે છે.
તમિલનાડુમાં 'ઓરેન્જ એલર્ટ' અને રજાઓ
ચક્રવાતને ધ્યાનમાં રાખીને IMDએ દરિયાકાંઠાના વિસ્તારો માટે "ઓરેન્જ એલર્ટ" જાહેર કર્યું છે.
- ભારે વરસાદની આગાહી: રામનાથપુરમ, પુડુક્કોટાઈ, તંજાવુર, તિરુવરુર, નાગપટ્ટીનમ, કરાઈકલ, થુથુકુડી, શિવગંગાઈ, અરિયાલુર અને મયિલાદુથુરાઈ સહિત અનેક જિલ્લાઓમાં ભારેથી અતિભારે વરસાદની આગાહી છે.
- શાળા-કોલેજો બંધ: ગંભીર હવામાનને ધ્યાનમાં રાખીને તમિલનાડુના અરિયાલુર, તિરુચી, તંજાવુર, વિલુપ્પુરમ, કુડ્ડલોર, તિરુવરુર, નાગપટ્ટીનમ, મયિલાદુથુરાઈ, પુડુચેરી અને કરાઈકલમાં શાળાઓ અને કોલેજોમાં રજા જાહેર કરવામાં આવી છે.
- માછીમારોને સૂચના: વહીવટીતંત્રે દરિયાકાંઠાના વિસ્તારોમાં રહેતા લોકોને સતર્ક રહેવાની અને માછીમારોને દરિયામાં ન જવાની સલાહ આપી છે.
Click it and Unblock the Notifications
Sign in with Google
