Gujarat Weather: ગુજરાતમાં વરસાદી સિસ્ટમ સક્રિય, 4 જિલ્લામાં રેડ એલર્ટ, ભરુચના વાલિયામાં 12 ઈંચ ખાબક્યો

Gujarat Weather: ગુજરાતમાં એકવાર ફરી વરસાદી સિસ્ટમ સક્રિય થઈ ગઈ છે. હવામાન વિભાગ દ્વારા રાજ્યમાં આજથી આગામી 5 દિવસ ભારેથી અત્યંત ભારે વરસાદની સંભાવનાઓ વ્યક્ત કરી છે. રાજ્યમાં એક સાથે ચાર વરસાદી સિસ્ટમ સક્રિય થવાના કારણે આગામી ત્રણ દિવસ ગુજરાતમાં ભારે વરસાદની સંભાવના છે. આજે ચાર જિલ્લામાં વરસાદનું રેડ એલર્ટ આપવામાં આવ્યું છે.

હવામાન વિભાગે ભરૂચ અને સુરત માટે રેડ એલર્ટ આપ્યું છે જ્યાં ભારેથી અતિ ભારે વરસાદ થવાની સંભાવના છે. આ ઉપરાંત બનાસકાંઠા, પંચમહાલ, દાહોદ, વડોદરા, ભરૂચ, ડાંગ, નવસારી, વલસાડ, તાપી અને દમણ તેમજ દાદરા નગર હવેલીમાં આજે અતિ ભારે વરસાદની આગાહી કરવામાં આવી છે.

હવામાન વિભાગે પાટણ, મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, આણંદ, મહિસાગર અને અમરેલી તેમજ ભાવનગરમાં આજે મંગળવારે ભારે વરસાદ પડવાની શક્યતાઓ હવામાન વિભાગે સેવી છે. જ્યારે ડાંગ, તાપી, નવસારી, વલસાડ અને દમણ, દાદરા નગર હવેલી માટે ઓરેન્જ એલર્ટ આપ્યું છે. 4થી 7 સપ્ટેમ્બર દરમિયાન પર રાજ્યમાં ઓરેન્જ અને યલો એલર્ટ આપ્યુ છે. જેમાં દક્ષિણ ગુજરાત, મધ્ય ગુજરાત, સૌરાષ્ટ્ર-કચ્છ અને ઉત્તર ગુજરાતના ભાગોનો સમાવેશ થાય છે.

ગુજરાતમાં છેલ્લા 24 કલાકમાં ભરૂચ, તાપી, ડાંગ, સુરતમાં સૌથી વધારે વરસાદ પડ્યો હતો. જેમાં સૌથી વધારે વરસાદ ભરૂચ જિલ્લાના વાલા તાલુકામાં પોણા 12 ઈંચ વરસાદ ખાબક્યો હતો. ત્યારબાદ તાપીના સોનગઢમાં સવા 10 ઈંચ વરસાદ પડ્યો હતો. વ્યારામાં પણ નવ ઈંચ વરસાદ ખાબક્યો હતો. વાલિયાનું ડહેલી ગામ પાણીમાં ગરકાવ થયું છે. વાલિયાના દેસાડ અને સોડગામ પણ બેટમાં ફેરવાયા હતા. વનખાડી અને કીમ નદીના પાણી ગામમાં ફરી વળ્યા હતા. વાલિયાથી માંગરોળ અને અંકલેશ્વરના માર્ગ પર પાણી ભરાયા હતા.

છેલ્લા 24 કલાકમાં લુણાવાડામાં સાડા પાંચ ઈંચ વરસાદ વરસ્યો હતો. વીરપુર તાલુકામાં સાડા ચાર ઈંચ વરસાદ વરસ્યો હતો. બાલાસિનોરમાં ચાર ઈંચ વરસાદ થયો હતો. ખાનપુર, કડાણા, સંતરામપુરમાં ત્રણ ત્રણ ઈંચ વરસાદ વરસ્યો હતો. મહીસાગર જિલ્લાનો કડાણા ડેમ 94.81 ટકા ભરાતા હાઈએલર્ટ જાહેર કરાયો છે. ડેમમાં હાલ 57 હજાર 818 ક્યુસેક પાણીની આવક થઇ રહી છે જ્યારે 45 હજાર 180 ક્યુસેક પાણીની જાવક થઇ છે. ડેમના પાંચ ગેટ ખોલી નદીમાં પાણી છોડવામાં આવી રહ્યું છે. ડેમમાંથી પાણી છોડાતા કાંઠા વિસ્તારોને એલર્ટ કરવામાં આવ્યા છે.

હવામાન નિષ્ણાંત અંબાલાલ પટેલે રાજ્યમાં અનેક વિસ્તારોમાં ભારે વરસાદની આગાહી કરી છે. તેમની આગાહી મુજબ રાજ્યમાં વધુ એક વરસાદી સિસ્ટમ આવશે. જેથી અનેક જગ્યાએ ભારે વરસાદ પડવાની શક્યાત છે. સૌરાષ્ટ્રમાં તેમજ ઉત્તર ગુજરાતમાં હળવા વરસાદ, મધ્ય ગુજરાતમાં ભારે વરસાદ વરસશે. તેમજ બંગાળનાં ઉપસાગરમાં એક પછી એક વરસાદી સિસ્ટમ બનશે. જેથી રાજ્યના દક્ષિણ ગુજરાત, મધ્ય ગુજરાત સહિતના અનેક ભાગોમાં ભારેથી અતિભારે વરસાદ પડી શકે છે.

English summary

Gujarat Weather: Rain system active in Gujarat, red alert in 4 districts, 12 inches rain in last 24 hrs in Walia district of Bharuch