સાણંદના માઇક્રોન સેમિકન્ડક્ટર પ્લાન્ટનો ક્લીનરૂમ દુનિયાનો સૌથી મોટો ક્લીનરૂમ બનશે
ચોકસાઈ અને શુદ્ધતાના વૈશ્વિક માપદંડો સાથે માઇક્રોન ટેકનોલોજીએ ગુજરાતના સાણંદમાં વિશ્વના સૌથી મોટા ક્લીનરૂમ પૈકી એકનું સફળતાપૂર્વક નિર્માણ પૂર્ણ કર્યું છે.
સેમિકન્ડક્ટર ચિપના મેન્યુફેક્ચરિંગ માટે અત્યંત નિયંત્રિત વાતાવરણ અનિવાર્ય છે, કારણ કે હવામાં તરતો એક નાનકડો રજકણ પણ ચિપની કાર્યક્ષમતાને નુકસાન પહોંચાડી શકે છે.
કંપનીના સીઈઓ સંજય મેહરોત્રાના જણાવ્યા મુજબ, સાણંદ પ્લાન્ટનો આ ક્લીનરૂમ 5 લાખ ચોરસ ફૂટમાં ફેલાયેલો છે, જે ઉચ્ચ સ્તરીય ટેકનોલોજી અને એન્જિનિયરિંગનો અદભૂત નમૂનો છે.
આ વિશાળ પ્રોજેક્ટમાં એફિલ ટાવર કરતા સાડા ત્રણ ગણું વધુ લોખંડ અને 100 ઓલિમ્પિક સ્વિમિંગ પૂલ ભરાય તેટલા કોંક્રિટનો ઉપયોગ કરીને મજબૂત માળખું તૈયાર કરાયું છે.
સંજય મેહરોત્રાએ વડાપ્રધાન નરેન્દ્ર મોદીના નેતૃત્વ અને સરકારની પ્રોત્સાહક નીતિઓની પ્રશંસા કરતા જણાવ્યું કે, આ પ્લાન્ટ ભારત માટે સેમિકન્ડક્ટર ક્ષેત્રે એક સીમાચિહ્નરૂપ સાબિત થશે.
સાણંદના આ પ્લાન્ટમાં હવાની શુદ્ધતા ઓપરેશન થિયેટર કરતા પણ વધુ રાખવામાં આવે છે, જેથી વાળના તાંતણા જેટલી અશુદ્ધિ પણ ઉત્પાદન પ્રક્રિયામાં અવરોધ ન બને.
ક્લીનરૂમમાં ફિલ્ટર કરેલી હવા ઉપરથી નીચે તરફ સતત વહેતી રહે છે, જે તાપમાન અને વાતાવરણને સ્થિર રાખીને મશીનોને ચોકસાઈપૂર્વક કાર્યરત રાખવામાં મદદરૂપ થાય છે.
અહીં તાપમાનમાં એક ડિગ્રીનો ફેરફાર પણ સહન કરવામાં આવતો નથી, કારણ કે મેમરી ટેસ્ટર મશીનો દ્વારા ઉત્પન્ન થતી ગરમીને નિયંત્રિત કરવી ગુણવત્તા માટે ખૂબ જરૂરી છે.
ઉત્પાદન પ્રક્રિયા અવિરત ચાલુ રહે તે માટે પાવર, કૂલિંગ અને એર સર્ક્યુલેશન માટે અત્યાધુનિક બેકઅપ સિસ્ટમ્સ ગોઠવવામાં આવી છે, જે વૈશ્વિક ધોરણો મુજબ કાર્ય કરે છે.
માઇક્રોન ટેકનોલોજી હાલ ભારતમાં 24,000 લોકોને રોજગારી પૂરી પાડે છે, અને તેના બેંગલુરુ તેમજ હૈદરાબાદ સ્થિત કેન્દ્રો વૈશ્વિક સ્તરે નવીન સંશોધનોમાં મહત્વનું યોગદાન આપી રહ્યા છે.
Click it and Unblock the Notifications
Sign in with Google
