ગેસ પુરવઠો ખોરવાતા મોરબી સિરામિક ઉદ્યોગમાં વેકેશનની જાહેરાત, આટલા દિવસ બંધ રહેશે

ઈરાન અને ઈઝરાયલ-અમેરિકા વચ્ચે વધતા તણાવને કારણે મોરબીનો સિરામિક ઉદ્યોગ મુશ્કેલીમાં મુકાયો છે. ખાડી દેશોમાં ચાલતા આ સંઘર્ષની સીધી અસર ગુજરાતના વેપાર જગત પર જોવા મળી રહી છે.

'સ્ટ્રેટ ઓફ હોર્મુસ' બંધ થવાથી ગેસ અને તેલના પુરવઠામાં મોટી કટોકટી સર્જાતા ઉત્પાદન પ્રક્રિયા અટકી છે. પ્રોપેન અને નેચરલ ગેસની અછતને લીધે મોરબીના 400 થી વધુ એકમો હાલ બંધ છે.

પરિસ્થિતિને ધ્યાને રાખી મોરબી સિરામિક એસોસિએશને આગામી 20 થી 25 દિવસ માટે સંપૂર્ણ વેકેશન જાહેર કર્યું છે. કોરોના કાળ પછી આ પ્રકારનું આટલું મોટું સામૂહિક શટડાઉન પ્રથમ વખત લેવાયું છે.

સામાન્ય રીતે કારખાનેદારો માત્ર જાળવણી માટે જ યુનિટ બંધ રાખતા હતા, પરંતુ અત્યારે ચિંતા વધી છે. ગેસ સપ્લાય ખોરવાતા ઉદ્યોગપતિઓ માટે ફેક્ટરીઓ ચાલુ રાખવી આર્થિક રીતે હવે અશક્ય બની ગઈ છે.

ભારત સરકાર આ મુદ્દે સક્રિય થઈ છે અને ઈરાન સાથે વાતચીત કરીને જહાજો છોડાવવા પ્રયાસ કરી રહી છે. તેમ છતાં જ્યાં સુધી પુરવઠો નિયમિત ન થાય ત્યાં સુધી રાહ જોવી અનિવાર્ય છે.

એસોસિએશનના પ્રમુખ મનોજ એરવાડિયાએ જણાવ્યું કે મીટિંગમાં સર્વાનુમતે લાંબા શટડાઉનનો મહત્વનો નિર્ણય લેવામાં આવ્યો છે. તમામ ઉદ્યોગકારો અત્યારે પોતાના એકમોમાં ફરજિયાત વેકેશન અને કામકાજ બંધ રાખવા સંમત થયા છે.

આ સમયગાળા દરમિયાન કારખાનેદારો મશીનરીનું જરૂરી મેન્ટેનન્સ કરાવી લેશે જેથી ભવિષ્યમાં કામગીરી સરળ રહે. ગેસ સપ્લાય પુનઃ શરૂ થયા બાદ નવા ખર્ચના અંદાજ સાથે ફરીથી ઉત્પાદન શરૂ કરાશે.

English summary

The Morbi ceramic sector pauses production for 20-25 days in response to gas and oil supply disruptions linked to the Strait of Hormuz, with factories performing essential maintenance and recalculating costs before resuming operations.